Qorako‘lchilik sub'yektlariga subsidiya beriladi

Vazirlar Mahkamasining “Qorako‘lchilik sub'yektlariga subsidiya berish tartibi to‘g‘risidagi nizomni tasdiqlash haqida”gi qarori loyihasi e'lon qilindi.

Qaror loyihasi qorako‘lchilik sohasida davlat siyosatini yanada takomillashtirish, qorako‘lchilik sohasida faoliyat yuritayotgan klasterlar faoliyatiga davlat darajasida e'tibor qaratish chora-tadbirlari samaradorligini oshirish, mehnat huquqlarini himoya qilish va mehnat muhofazasini kuchaytirish, aholi bandligini ta'minlash bo‘yicha muvofiqlashtirilgan ishlarni amalga oshirishda davlat va xo‘jalik boshqaruvi organlari, mahalliy ijro hokimiyati organlari mas'uliyatini kuchaytirish, shuningdek, respublikada qorako‘lchilik bilan shug‘ullanish, sohada jun va terini qayta ishlash bo‘yicha dunyo tajribasidan foydalangan holda eksport salohiyatini oshirish maqsadida ishlab chiqilgan.

Qorako‘lchilik bilan shug‘ullanuvchi xo‘jaliklarga davlat tomonidan nasldor qo‘y va echki, shu jumladan qorako‘l zotli qo‘ylarning xorijiy davlatlardan import qilingan har bir embrioniga 400 ming so‘m miqdorda subsidiya ajratiladi.

Chorvachilik tarmog‘ini yanada rivojlantirish faoliyatini samarali tashkil etishni ta'minlash bo‘yicha Qoraqalpog‘iston Respublikasi va viloyatlar (shaharlar) komissiyalari kalendar yilining 1 mayiga qadar kelgusi yil uchun subsidiya oluvchilar ro‘yxatini shakllantiradi.

Viloyat komissiyasi kalendar yilining 5 mayiga qadar subsidiya oluvchilar ro‘yxatini umumlashtirib, Respublika “Qorako‘lchilik” uyushmasiga taqdim etadi.

Uyushma viloyat komissiyasi tomonidan taqdim etilgan ro‘yxatni ular taqdim etgan paytdan boshlab besh ish kunida umumlashtirib, Moliya vazirligi bilan kelishilgan holda Vazirlar Mahkamasiga taqdim etadi.

Vazirlar Mahkamasi Uyushma tomonidan taqdim etilgan ro‘yxatni uch ish kunida belgilangan tartibda ko‘rib chiqib tasdiqlaydi hamda ijro uchun Qo‘mitaga hamda Moliya vazirligiga yuboradi.

Moliya vazirligi kelgusi yil uchun davlat budjeti parametrlarini shakllantirishda subsidiya oluvchilarga subsidiya ajratish uchun zarur mablag‘larni hisobga oladi.

Qo‘mita subsidiya ajratish bo‘yicha viloyat komissiyasi tomonidan shakllantirilgan ro‘yxatga yil davomida haqiqiy holatdan kelib chiqib, tegishli o‘zgartirish va qo‘shimchalar kiritish bo‘yicha Vazirlar Mahkamasiga taklif kiritishi mumkin.