Konimexda mahalliy kengash deputatlari hokimning taklifini tasdiqlashmadi

Kun.uz manbasi va mazkur sessiyadan yozib olingan audiomaterialga (audioyozuv tahririyatda mavjud) ko‘ra, mazkur masalani ko‘rib chiqishda kengash raisi – tuman hokimi Muratxan Egamqulov prezidentning 2020 yil 6 noyabrdagi «O‘zbekistonning yangi taraqqqiyot davrida ta'lim-tarbiya va ilm-fan sohalarini rivojlantirish chora-tadbirlari to‘g‘risida»gi farmoni talablariga zid ish tutgan.

Mazkur farmonda umumta'lim muassasalarining bo‘sh direktor lavozimlari uchun hududiy xalq ta'limi boshqarmalari kiritgan nomzodlar xalq deputatlari tuman (shahar) kengashlari tomonidan tanlovdan o‘tkazilishi nazarda tutilgan. Ya'ni nomzodlar tanlovda tegishli maktab ko‘rsatkichlarini kelgusi uch yilda yuqori darajaga olib chiqish bo‘yicha o‘z dasturi bilan ishtirok etishi, deputatlar esa eng yaxshi 3 yillik dastur egasini tanlab olishi zarur edi.

Ammo, garchi sessiyada 12ta maktab direktorligi uchun 30 nafardan ortiq nomzod ishtirok etayotgan bo‘lsa ham, kengash raisi bo‘lgan hokim deputatlardan hech qanday tanlovsiz 12 nomzodni tasdiqlab berishni so‘ragan. Deputatlar esa bunga qarshi chiqib, masala noto‘g‘ri tartibda ko‘rib chiqilayotganini bildirishgan. Taklifi ma'qullanmagan hokim esa ushbu masalani navbatdagi sessiyaga qoldirishga majbur bo‘lgan.

Deputatlarga sessiya boshlanishidan oldin tarqatilgan sessiya materiallari yakunda yig‘ib olingani aytilmoqda. Chunki, undagi qaror loyihasida tasdiqlangan (!) direktorlar ro‘yxati bo‘lgan.

Shuningdek, audiomaterialda tuman hokimi Muratxan Egamqulov va tuman xalq ta'limi bo‘limi mudiri Gulzoda Abdullayeva tortishib qolganini, hokim Abdullayevaga uning faoliyati bo‘yicha jinoiy ish qo‘zg‘atishi mumkinligini aytib, tahdid qilganini eshitish mumkin.

— Uchtepaga bordim, 8-maktabga. Bilmayman, kimni qo‘ymoqchisizlar. Mahallaning raisi, MJCh raisi, oqsoqollar umumiy yig‘ilish qaror qilib Mambetqulov Nurkenni aytyapti. Qani u, keldimi? Mana, mana shu shu bola, yoshlar bo‘yicha ekan. A bular (tuman XTBni nazarda tutmoqda) boshqasini qo‘ymoqchi. Men tushunmayman bularga, nima bo‘lyapti o‘zi bu yerda?! Yana tanish-bilishchilik yoki korrupsiyaga o‘xshagan narsami?

— Bu yerda tanish-bilishchilik ham, korrupsiya ham yo‘q.

— Nega bermaysizlar u kadrlarni bo‘lmasa? Siz gapni kam qiling, men sizga ishonishni ham yig‘ishtirib qo‘yganman. Jinoiy ish qo‘zg‘attiraman kerak bo‘lsa sizning ishingizga men.

— Men jinoiy ish qilganim yo‘q, o‘tgan safar ham ko‘pning ichida shunday dedingiz.

— Hali ko‘rasiz. Men umuman noroziman ta'limdan.

Ruslan Saburov,
Kun.uz muxbiri