Turkiyada Anqaraning Istanbul konvensiyasidan chiqishiga qarshi noroziliklar bo‘lib o‘tdi

20 mart kuni Turkiyada mamlakatning ayollarni zo‘ravonlikdan himoyalash haqidagi Istanbul konvensiyasidan chiqish qaroriga qarshi norozilik namoyishlari bo‘lib o‘tdi. Minglab odamlar Turkiya prezidenti Rajab Toyyib Erdo‘g‘anni ushbu qarorini bekor qilishga chaqirishgan.

Istanbulda namoyishchilar o‘ldirilgan ayollar suratlari va transparantlar bilan ko‘chaga chiqib, “Biz qo‘rqmaymiz. Biz bo‘ysunmaymiz” deb hayqirishgan. OAV ma'lumotlariga ko‘ra, shunga o‘xshash aksiyalar poytaxt Anqarada va Izmirda bo‘lib o‘tgan. 

Yevropa kengashining Istanbulda imzolangan konvensiyasi oilada ayollarga nisbatan zo‘ravonlikning oldini olish va unga qarshi kurashishga qaratilgan. Biroq turk konservatorlari bu konvensiya oilaviy qadriyatlarga putur yetkazadi, deb hisoblamoqdalar. Ular, shuningdek, erkaklar va ayollar o‘rtasidagi tenghuquqlik tamoyiliga qarshi chiqadilar.

Anqaraning konvensiyadan chiqishiga qarshilar Yevropa ittifoqiga kirishga a'zo hisoblangan Turkiya ushbu xatti-harakati bilan Yevropa qadriyatlaridan yanada uzoqlashishini aytishmoqda. 

O‘z navbatida, Yevropa ittifoqi Turkiyaning hujjatdan chiqishini tushunmayotgani va bundan afsusdaligini aytgan. 

“Biz Turkiyaning hattoki Istanbul nomini olgan bu hujjatdan chiqishidan afsusdamiz va bu qarorni tushunmayapmiz”, deb aytgan Yevropa ittifoqi diplomatiyasi rahbari Jozep Borrel.

Uning ta'kidlashicha, pandemiya vaqtida butun dunyoda ayollar va qizlarga nisbatan zo‘ravonlik yangi darajaga chiqdi va shu sababli unga qarshi global sa'y-harakatlarni faollashtirish lozim.

“Biz Turkiyani o‘z qarorini bekor qilishga chaqiramiz. Umid qilamizki, u yana ushbu konvensiyaga qo‘shiladi”, deb ta'kidlab o‘tgan Borrel.

Hozirda konvensiyani 47 mamlakatdan 18tasi ratifikatsiya qilgan. 2011 yilda imzolangan konvensiyada zo‘ravonlikning oldini olish bo‘yicha minimal standartlar bayon etilgan.