Samarqand yil oxirigacha «millionlik shahar»ga aylanadi, shaharda 5 ta tuman tashkil etiladi - Turdimov

Kun.uz muxbiri xabariga ko‘ra, uchrashuvda Samarqand shahrida ham «propiska» bilan bog‘liq muammolar paydo bo‘layotgani, subsidiya asosida uy olish maqsadida bo‘lgan yoshlar qog‘ozbozlikdan charchayotganini ma'lum qildi.

«Biz Samarqand shahrini «millionlik shahar»ga aylantirmoqchimiz. Shuning harakatini qilyapmiz. Kechi bilan yil yakunigacha bu rejamiz amalga oshadi. Samarqand shahri [va unga yondosh hududlar]da bugun bir milliondan oshiq aholi yashaydi. Past Darg‘om tumanining bir qismi qo‘shilib ketgan, Samarqand tumanining qariyb 90 foiz qismi shahar tarkibida turibdi. Biz Samarqandni «millionlik shahar» qilib, uning tarkibida beshta tuman tuzmoqchimiz.

Dunyoda «millioner shahar»larning o‘z statusi bor. Har qanday biznesmen biror tumanga pul qo‘yishdan oldin aholisi qanchaligiga qiziqadi. Mehnat resursi boymi-yo‘qmi, deb so‘raydi. Odam ko‘p bo‘lsa, bu yerga pul tikadi. Nega tikadi, chunki shaharda ko‘p odam bo‘lsa, ko‘p yeydi, ko‘p odam kirib-chiqadi. Shuning uchun ham millionli shaharning statusi o‘zgacha.

Masalan, Qozog‘iston. Bizdan ikki barobar aholisi kam. Lekin uchta millionlik shaharlari bor. Almati, Nursulton va Chimkent. Bizda esa bitta Toshkent shahri.

Samarqand bemalol «millionlik shahar» bo‘ladi. Qozog‘istonda Chimkentni u yog‘idan, bu yog‘idan cho‘zib, juda katta hududni birlashtirib millioner shahar qilishdi. Biz esa kichkinagina joydan bir million qilamiz. Shahrimizda aholi zichligi Odessa bilan bab-barobar. Samarqandning ahamiyati shunaqa. Biz shunga tayyorgarlik ko‘ryapmiz», – dedi Turdimov.

Viloyat hokimi Samarqand shahrida 5 ta shahar tumani tashkil etilishini ta'kidlab o‘tdi.

Tasdiqlanmagan ma'lumotlarga ko‘ra, shaharning azaliy Bog‘ishamol, Siyob va Temiryo‘l tumanlari tiklanishi, shuningdek, yangidan Gulobod va Qorasuv tumanlari barpo etilishi mumkin.

Davlat statistika qo‘mitasi ma'lumotiga ko‘ra, 2020 yil 1 yanvar holatiga, Toshkent shahri aholisi 2,6 millionni tashkil etgan. Aholi soni bo‘yicha O‘zbekistonning ikkinchi eng yirik shahri – Namangan (626 ming doimiy aholi). Bu borada Samarqand shahri 546 ming doimiy aholi bilan uchinchi o‘rinni egallaydi.

Shuningdek, Andijon shahrida 441 ming kishi yashaydi. O‘zbekistonning boshqa shaharlarida aholi soni 300 mingga yetmaydi.