Rishton va So‘x tumanlarini bog‘lovchi yo‘l ochildi

1 aprel kuni Farg‘ona viloyati Rishton tumanidan Qirg‘iziston hududi orqali So‘x anklaviga boruvchi yo‘lning ochilish marosimi bo‘lib o‘tdi.

«Rishton» bojxona chegara postining ochilishida Farg‘ona viloyati hokimi Xayrullo Bozorov va Botken viloyati gubernatori Omurbek Suvonaliyev boshchiligidagi rasmiylar qatnashdi.

Rishton–So‘x yo‘li 2019 yil avgustida ham ochilgan, ammo ikki kun o‘tib yana yopilgandi. Keyinchalik O‘zbekiston bosh vaziri Abdulla Aripov bu Yevrosiyo iqtisodiy ittifoqi talabi ekanini tushuntirgandi.

19 kilometrlik bu yo‘l yopiqligi sabab, so‘xliklar Rishtonga kelib ketish uchun 80 km aylanma yo‘lni bosib o‘tishiga to‘g‘ri kelayotgandi.

Eslatib o‘tamiz, Qirg‘iziston prezidenti Sadir Japarov 11-12 mart kunlari rasmiy tashrif bilan Toshkentga kelgandi. Muzokaralardan so‘ng tomonlar chegara borasidagi barcha masalalarni 3 oy ichida hal etishga kelishib olishgandi.