Qashqadaryoda «Matiz» va «Damas» ishtirokidagi «avariya»da bir kishi halok bo‘ldi

Qashqadaryo viloyati Qarshi tumanida «Matiz» va «Damas» o‘zaro to‘qnashib, yo‘l-transport hodisasi sodir bo‘lgan. O‘z yo‘lida harakatlanib kelayotgan «Damas»ga qarama-qarshi yo‘nalishga chiqib ketgan «Matiz» kelib urilgan. Oqibatda, bir nafar shaxs vafot etgan. Bu haqda Qashqadaryo viloyati IIB axborot xizmati xabar bermoqda.

Ma'lum bo‘lishicha, 2021 yil 26 mart kuni soat 13:55larda davlat ahamiyatidagi 4R 89 «Qarshi–Talimarjon IES» avtomobil yo‘lining Qarshi tuman Saroy qishlog‘i hududidan o‘tuvchi 5-kilometrida ayanchli yo‘l-transport hodisasi ro‘y bergan. O‘z yo‘lida harakatlanib kelayotgan «Damas»ga ro‘paradan «Matiz» kelib urilgan. Oqibatda, bir nafar shaxs vafot etgan.

Surishtiruvlarda aniqlanishicha, «Matiz»  haydovchisi yomg‘ir yog‘ib turgan noqulay ob-havoda e'tiborsizlik qilib boshqaruvni yo‘qotgan. So‘ng yo‘lning qarama-qarshi yo‘nalishiga chiqib ketgan va borib «Damas»ga urilgan. Oqibatda, har ikkala mashinaning haydovchilari, shuningdek, «Damas»da yo‘lovchi sifatida ketayotgan shaxs og‘ir tan jarohati olib, shifoxonaga yotqizilgan. «Matiz»da yo‘lovchi sifatida ketayotgan shaxs esa og‘ir tan jarohatlari bilan shifoxonaga yotqizilgan hamda ko‘rsatilgan tibbiy yordamga qaramasdan vafot etgan.