17:53 / 06.04.2021
11989
Бухоро тиббиёт институти фаолиятини прокуратура ўрганмоқда

Бухоро вилоят прокуратураси Бухоро тиббиёт институтида йирик коррупция ҳолатларига қўл урилгани ҳақидаги хабардан сўнг институт фаолияти юзасидан ўрганиш бошлади.

Фото: Бухоро давлат тиббиёт институти

Бу ҳақда Бош прокуратуранинг жамоатчилик билан алоқалар ва ҳуқуқий ахборот бўлими бошлиғи Ҳаёт Шамсутдинов Kun.uz'га маълум қилди.

Таъкидланишича, мазкур ўрганиш учун вилоят бандлик бош бошқармаси, давлат молиявий назорат бошқармаси ва вилоят монополияга қарши курашиш бошқармасидан мутахассислар жалб қилинган.

Эслатиб ўтамиз, «Одам анатомияси» дарслиги муаллифларидан бири ва айни вақтда институт ректори в.в.б. Шуҳрат Тешаев «Bitubi Grupp» МЧЖ таъсисчиси Эдуард Ицков билан келишган ҳолда, бир нечта шартномалар орқали 1,4 млрд сўмга яқин институт пулларини шу корхонага кўчириб бергани айтилмоқда.

Бухоро давлат тиббиёт институти ҳолатга муносабат билдириб, эътирозларни рад этган.

Коррупцияга қарши курашиш агентлиги бу ҳолатни тафтиш қилишни сўраб, 2 апрель куни Соғлиқни сақлаш ҳамда Олий ва ўрта махсус таълим вазирликларига хат юборган.

Top