Surxondaryodagi «avariya»da ikki nafar piyodaning o‘limiga sabab bo‘lgan haydovchi qochib ketdi

Surxondaryo viloyati Sherobod tumanida sodir bo‘lgan yo‘l-transport hodisasida «Damas» haydovchisi ikki nafar piyodani urib yuborgan. So‘ng, jabrlanuvchilarga yordam ko‘rsatmasdan, qochib ketgan. Oqibatda o‘z vaqtida yetarli tez tibbiy yordam ko‘rsatilmagan piyodalar tuman tibbiyot birlashmasiga qarashli shifoxonada vafot etgan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yilning 6 may kuni soat 22:45 larda, tumanning Kattabog‘ mahallasi hududidan o‘tgan 4-N 601 avtomobil yo‘lining 6-kilometrida, tumanning Chuyinchi mahallasida yashovchi, 31 yoshli P.S. «Damas» mashinasi bilan yo‘l-transport hodisasi sodir etgan.

U tumanning Kattabog‘-Qulluqsho mahallasi yo‘nalishida ketayotgan vaqtda yo‘lning o‘ng tomon chekkasidan harakatlanib ketayotgan piyodalar, tumanning Kattabog‘ mahallasida yashovchi, S.A., Yu.O. va N.A.larning orqa tomonidan urib yuborgan. Ammo turli darajadagi tan jarohatlari olib hayoti xavf ostida qolgan piyodalarga yordam ko‘rsatmasdan qasddan voqea joyidan yashiringan. Oqibatda, ko‘rsatilgan tibbiy muolajalarga qaramasdan, S.A. va Yu.O. shifoxonada vafot etgan.

Shundan so‘ng, mazkur holat yuzasidan tuman bo‘yicha «To‘sib ushlash» rejasi amalga oshirilib, ko‘rilgan choralar natijasida, haydovchi P.S. qo‘lga olingan. Surishtiruvlarda, «Damas» haydovchisi P.S. mashinani hech qanday hujjat bo‘lmagan holda boshqargani aniqlangan.

Qayd etilishicha, Sherobod tumani IIB huzuridagi tergov bo‘linmasi tomonidan haydovchi P.S.ga nisbatan jinoyat kodeksining 266-moddasi 3-qismi «a» bandi va 117-moddasi 3-qismi «a» bandi bilan jinoyat ishi qo‘zg‘atilib, jinoyat protsessual kodeksining 221-moddasi tartibida ushlangan. Hozirda mazkur holat yuzasidan dastlabki tergov harakatlari olib borilmoqda.