Xorazm viloyati iqtisodiy sudlarida tadbirkorlar foydasiga 12,7 mlrd so‘m undirildi

Xorazm viloyat sudining iqtisodiy ishlar bo‘yicha sudlarida 2021 yilning 3 oyida jami 1944 ta ish ko‘rilgan bo‘lib, shundan 1642 tasi qanoatlantirilgan, 251 tasi bo‘yicha da'vo rad qilingan, 28 ta da'vo ko‘rmasdan qoldirilgan, 23 ta ish yuritish tugatilgan. 677 ta ish (35 foiz) sayyor sud majlislarida ko‘rilgan. 

Sudlarda ko‘rilgan ishlar o‘tgan yilning shu davriga nisbatan oldi-sotdi shartnomasi bo‘yicha 21 taga, mahsulot yetkazib berish shartnomasi bo‘yicha 323 taga, haq evaziga xizmat ko‘rsatish shartnomasi 27 taga, kredit shartnomasi bo‘yicha 41 taga, tadbirkorlik sub'yektlarining banklardagi hisobvaraqlari bo‘yicha operatsiyalarni to‘xtatib qo‘yish yuzasidan 350 taga, tadbirkorlik sub'yektlariga moliyaviy jarimalar qo‘llash 32 taga ko‘paygan.

Shuningdek, xususiy tadbirkorlik sub'yektlari, shu jumladan kichik biznes sub'yektlari, fermer va dehqon xo‘jaliklari hamda yakka tartibdagi tadbirkorlarning da'vogarligida 180ta ish ko‘rilib, ularning foydasiga 12,7 mlrd so‘m mablag‘lar undirish to‘g‘risida qarorlar qabul qilingan.  

79 nafar jismoniy va yuridik shaxslarning murojaati eshitilib, ularga  huquqiy tushuntirishlar berilgan.