Dang‘arada kasb-hunar maktabi direktori o‘rinbosari pora bilan qo‘lga tushdi

Farg‘ona viloyati Dang‘ara tumanidagi 2-sonli kasb-hunar maktabi direktorining o‘quv ishlari bo‘yicha o‘rinbosari lavozimida ishlagan O.H. ustidan sud hukmi o‘qildi. Bu haqda Oliy sud axborot xizmati xabar bermoqda. 

Ma'lum qilinishicha, O.H. 2017 yildan Dang‘ara tumanidagi sobiq transport kasb-hunar kollejining o‘quv ishlari bo‘yicha direktor o‘rinbosari vazifasida ishlab kelib, kollejda tashkil etilgan pedagog-xodimlarga o‘quv va pedagogik yuklamalarni taqsimlash bo‘yicha tarifikatsiya komissiyasi a'zosi hisoblangan.

U o‘qituvchilarga dars soatlarini taqsimlash vazifasini bajargan holda mazkur vakolatidan o‘zining shaxsiy manfaatlari uchun foydalanib, korrupsion yo‘llar bilan noqonuniy boylik orttirib kelgan.

Direktor o‘rinbosari sobiq kollej o‘qituvchisi S.U.ga 2018—2019 o‘quv yilida 818 soat o‘quv dars soatlarini taqsimlab berganlik evaziga 2018 yilning sentabr—dekabr oylarida 400 ming so‘m va takroran 2019—2020 o‘quv yilida unga 180 soat qo‘shimcha o‘quv dars soatlari qo‘shib berish evaziga 2019 yilning noyabr oyida 445 ming so‘m miqdoridagi pullarni pora tariqasida olgan. 

Keyingi o‘quv yilida esa S.U.ning dars soatlari kamayib ketgan. Natijada o‘qituvchi hamda direktor o‘rinbosari o‘rtasida kelishmovchilik bo‘lgan. Direktor o‘rinbosari O.H. pora sifatida olgan pullardan 500 ming so‘mini Dang‘ara tuman 2-son kasb-hunar maktabi binosi yaqinida S.U.ga qaytarib berayotgan vaqtida huquqni muhofaza qiluvchi organlar tomonidan o‘tkazilgan tezkor tadbir davomida jinoyat ustida qo‘lga olingan. 

Jinoyat ishlari bo‘yicha Dang‘ara tuman sudi tomonidan mazkur jinoyat ishi ko‘rib chiqilib, O.H.ga O‘zbekiston Respublikasi Jinoyat kodeksining 210-moddasi 2-qismi “a” bandi bilan Jinoyat kodeksining 45-moddasini qo‘llab, 3 yil muddatga moddiy javobgarlik va mansabdorlik lavozimlarida ishlash huquqidan mahrum qilish, JKning 57-moddasini qo‘llab, to‘rt yil ozodlikni cheklash jazosi tayinlandi. Jazoni tayinlashda, uning qilmishidan pushaymonligi, uch nafar farzandi borligi, ayolligi inobatga olingan.

Eslatib o‘tamiz, avvalroq Farg‘onada 200 dollar pora bilan qo‘lga tushgan bog‘cha mudirasiga jazo tayinlangani haqida xabar berilgan edi.