O‘zbekistonda xotin-qizlarga nisbatan zo‘ravonlik holatlarining 73 foizi oilada sodir etilgan

2021 yilda ayollarga nisbatan zo‘ravonlik o‘tkazgan 508 nafar shaxsga nisbatan ayblov hukmi chiqarildi. Bu haqda AOKAda Mahalla va oilani qo‘llab-quvvatlash vazirligi mutasaddilari ishtirokida o‘tkazilgan matbuot anjumanida ma'lum qilindi.

Qayd etilishicha, joriy yilning o‘tgan vaqti davomida Reabilitatsiya markazlariga murojaat qilgan 4 205 nafar fuqaroning 1 991 nafariga psixologik, 1 524 nafariga huquqiy, 115 nafariga tibbiy yordam berildi. 100 nafariga hujjatlarini qayta tiklashda, 24 nafariga sud va boshqa idoralarda vakillik, 89 nafariga himoya orderini olish, 362 nafariga boshqa masalalarda yordam ko‘rsatildi.

“Bugungi kunga qadar zo‘ravonlikdan jabr ko‘rgan 11 300 nafar xotin-qizga himoya orderi berildi. Mahalla fuqarolar yig‘inlari vakillari bilan hamkorlikda olib borilgan profilaktik ishlar natijasida 9 400ta oila yarashtirildi, 6 658ta oiladagi nizolar bartaraf etildi.

2021 yilda ayollarga zo‘ravonlik va tazyiq o‘tkazish bilan bog‘liq 598ta ish ko‘rilib, 508 nafar shaxsga ayblov hukmi chiqarilgan. Xotin-qizlarga nisbatan qayd etilgan tazyiq va zo‘ravonlik holatlarining 73 foizi ularning oilalarida sodir etilgan”, deyiladi ma'lumotda.

Bildirilishicha, 2021 yil 1 iyundan boshlab “himoya orderi” nusxasini olgan, ya'ni tazyiq o‘tkazgan yoki zo‘ravonlik sodir etgan yoxud ularni sodir etishga moyil bo‘lgan shaxslar ham profilaktik hisobga olinadi.

Bundan oldin, Reabilitatsiya markazlariga zo‘ravonlikdan himoya so‘rab 209 nafar erkak murojaat qilgani xabar berilgandi.