12:53 / 07.07.2021
933
Навоийда давлат захирасидаги ерни сотмоқчи бўлган шахс ушланди
Фото: Бош прокуратура ҳузуридаги департамент

Навоий вилояти Қизилтепа туманида давлат захирасидаги ерни сотмоқчи бўлган шахс ушланган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департаментнинг Қизилтепа туман бўлими томонидан ДХХ Навоий вилояти бошқармаси ҳамда ИИБ ходимлари билан ҳамкорликда ўтказилган тезкор тадбирда давлат ерини сотмоқчи бўлган И.И. ушланган.

У фуқаро З.га отаси номига расмийлаштирилган 50 сотих ва давлат захирасидаги 50 сотих – жами 1 гектар ерни фирибгарлик йўли билан 8 000 АҚШ долларига сотишга келишиб, олдиндан 4 000 долларни олган вақтида ашёвий далиллар билан қўлга олинган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

 

Top