AQShda majburiy niqob taqish rejimiga qaytildi

AQShda koronavirusga qarshi emlanganlar uchun majburiy niqob taqish rejimini qaytarishga qaror qilindi.

Tegishli choralar koronavirus tarqalishi yuqori darajada bo‘lgan hududlardagina amal qiladi. Gap AQSh hududining deyarli uchdan ikki qismi, asosan janubiy va g‘arbiy shtatlar haqida bormoqda.

Ushbu hududlarda koronavirusga qarshi to‘liq emlangan odamlar binolar ichida, jamoat joylarida, maktablarda niqob taqishlari zarur bo‘ladi.

Ta'kidlanishicha, emlangandan keyin virusning “delta” shtammini yuqtirib olganlar ba'zi holatlarda uni boshqalarga yuqtirishi mumkinligi haqida ma'lumotlar olingan. Cheklovlar Hindistonda paydo bo‘lgan “delta” shtammi AQShda tez tarqalayotgani va hozirda mamlakatda aniqlanayotgan kasallanish holatlarining 80 foizdan ko‘prog‘i ushbu shtammga to‘g‘ri kelayotgani haqidagi ma'lumotlardan keyin qaytarildi.

AQSh prezidenti Jo Bayden emlash bo‘yicha kampaniyani kuchaytirish va niqoblar taqish mamlakatga 2020 yilda to‘qnash kelgan lokdaunlardan qochish imkonini berishini aytgan.