Futbol olimpiadasi. Ispaniya 5, Meksika 6 gol urdi, yarimfinal juftliklari ma'lum

58 soniyada xaloskor gol

Ispaniya – Kot-d`Ivuar 5:2
Gollar: 0:1 – 10 Bayi, 1:1 – 30 Olmo, 1:2 – 90 Gradel, 2:2 – 90 Rafa Mir, 3:2 – 98, penalti Oyarsabal, 4:2 – 117 Rafa Mir, 5:2 – 120 Rafa Mir.
Ispaniya U-23 – Unai Simon, Mingesa (Valexo, 10), Erik Garsiya, Miranda (Kukurelya, 105), Pau Torres, Pedri (Soler, 102), Subimendi (Monkayola, 105), Asensio (Hil, 68), Olmo, Oyarsabal, Merino (Rafa Mir, 90).
Kot-d`Ivuar U-23 – Tape, Diallo, Bayi, Dabila, Singo, Kessie, Kuassi (Kuao, 114), Gradel, Kuame (Keyta, 90), Dao, Timit (Diallo, 63).
Ogohlantirishlar: Olmo (70), Dabila (74), Erik Garsiya (77), Soler (114).

Olimpiya turniri qizg‘in bahslar bosqichiga o‘tdi. Tribunalarga muxlislar ham qaytdi, yuzaga kelgan muhit o‘yin sifatiga ham ijobiy ta'sir ko‘rsatdi. Shanba kuni o‘tkazilgan ilk o‘yin Yaponiyadagi o‘yinlarning eng yaxshisi bo‘ldi va buning uchun ivuarliklardan minnatdor bo‘lish kerak. Ularga qadar hech bir jamoa, Argentina ham ispanlarga qarshi jiddiy muammo yarata olmagandi.

Tanaffusga qadar Unai Simon ikkita top darajadagi seyvlar ijro etib, jamoasini muqarrar gollardan qutqardi, ammo baribir Bayiga xalal bera olmadi. «MYu» himoyachisi burchak zarbasidan keyin hisobni ochdi, bu vaqtda «Qizil furiya» Mingesa jarohatlanib o‘yinni tark etganidan keyin joylarni qayta taqsimlashga ulgurmagandi. Ammo tanaffus arafasida Dani Olmo baribir nishonni to‘g‘ri ola bildi. Yevro-2020 boshidan buyon ushbu ispaniyalik futbolchi raqiblar darvozalari tomon jami 27 zarba yo‘llagan, ammo ulardan birortasi golga aylanmagandi, ammo raqib darvozabon hududida unga ko‘kragi bilan to‘pni tashlab berganida bu vaziyatdan gol urmaslikning iloji qolmagandi.

Keyin Ispaniya yana jar yoqasida harakat qildi. Barselonalik vunderkind Pedri ko‘plab hujumlar uyushtirdi, ammo uning jamoadoshlari vaziyatlardan foydalanishda oqsashda davom etdi. Ko‘plab zarbalar xato berildi, Oyarsabal urgan gol ofsayd tufayli bekor qilindi, Asensioning zarbasi darvoza ustuni va to‘sin birlashgan nuqtadan qaytdi... Asosiy vaqtning so‘nggi daqiqalarida esa Oyarsabalning yaqin masofadan darvozabonni mo‘ljalga olishi ispanlarga bu kechada omad kulib boqmasligini ko‘rsatgandek edi. Qarshi hujumda Gradelning zarbasi yo‘l-yo‘lakay Valexoga tegib rikoshet orqali darvozaga yo‘l oldi, Simon bu vaziyatda qutqara olmasdi.

Favoritning halokatini zaxira o‘rindig‘idan ko‘tarilgan Rafa Mir bekor qildi, u maydonga tushib birinchi bor to‘pga teginishidayoq hisobni tenglashtirdi, bu vaqtda u maydonga tushganiga 58 soniya bo‘lgandi! Bu vaqtda asosiy vaqtga qo‘shib berilgan uchinchi daqiqa ham poyoniga yetayotgandi, qo‘shimcha bo‘limlarda esa Ispaniya guruh bosqichida amaldagi vitse-chempion Germaniyani uyiga ravona qilgan raqibni butkul taslim etdi. 98-daqiqada to‘p uchun kurash vaqtida Bayi to‘pni qo‘li bilan o‘ynadi, videotakrordan keyin hakam nuqtani ko‘rsatdi va Oyarsabal jamoasini oldinga olib chiqdi.

 

 

 

 

Posmotret etu publikatsiyu v Instagram

 

 

 

 

 

 

 

 

 

 

 

Publikatsiya ot Selección Española de Fútbol (@sefutbol)

Bu goldan keyin ivuarliklarning o‘yini sochilib ketdi, natijada Rafa Mir Olimpiadalar pley-offlarida 2008 yildan keyingi ilk het-trikni rasmiylashtirdi. «Bizda buyuk ishlar qilishga qodir jamoa bor. Biz shunchaki xotirjamlikni saqlagan holda o‘z o‘yinimizni namoyish etishimiz kerak edi», — dedi o‘yindan keyin oqshom qahramoni.

Klass evaziga g‘alaba

Braziliya – Misr 1:0
Gol: 1:0 – 37 Mateus Kunya.
Braziliya U-23 – Santos, Nino, Diyego Karlos, Arana, Dani Alves, Duglas Luis, Bruno Gimaraes, Antoni (Malkom, 65), Mateus Kunya (Paulino, 54), Risharlison (Gabriel Menino, 90), Klaudino (Reyner, 65).
Misr U-23 – El-Shenavi, El-Eraki (Ashur, 62), Galal, Hamdi, El-Fotu, Subhi, Hamdi (Mansi, 84), Muhammad (Maher, 84), Tavfiq, Xegazi, Rayan (Muhsin, 62).
Ogohlantirishlar: Antoni (32), Tavfik (42).

Ispanlardan farqli ravishda Braziliya o‘z o‘yinini asablar jangisiz o‘tkazdi, lekin amaldagi jahon chempionlari uch markaziy himoyachi bilan himoya qo‘rg‘oni tuzgan «fir'avnlar» himoyasini yorib o‘tishi uchun mehnat qilish talab etildi. Bu safar ham ish Risharlisonsiz bitmadi, guruh bosqichida besh golga mualliflik qilgan hujumchi bu safar qanotdan yorib o‘tib 11 metrlik nuqta atrofida turgan Mateus Kunyani to‘p bilan ta'minladi va u vaziyatni xotirjamlik bilan baholab, to‘pni darvoza to‘riga joylashtirdi.

«Selesao» bosh murabbiyi Andre Jardinni hal qiluvchi o‘yinlar oldidan tashvishga solishi mumkin bo‘lgan yagona muammo — vaziyatlardan foydalanishdagi sustkashliklardir. Bu muammo butun turnir davomida brazillarning og‘riqli nuqtasi bo‘lib kelmoqda, o‘yinning so‘nggi qismida misrliklar hujumda o‘ynadi, brazillar esa qarshi hujumlar vaqtida bir necha qulay vaziyatlardan foydalana olishmadi 

Meksika — soyadagi favoritmi?

Yaponiya – Yangi Zelandiya 0:0 (pen - 4:2)
Yaponiya U-23 – Tani, Xasioka, Tomiyasu, Yosida, Xatate (Mitoma, 90), Endo, Kubo, Doan (Miyosi, 105), Tanaka (Itakura, 90), Soma (Nakayama, 69), Xayasi (Ueda, 69).
Yangi Zelandiya U-23 – Vud, Elliott (Ingem, 79), Rid (Makkouett, 51), Peynaker, Stensness, Kakase, Lyuis, Bell, Ueyn (Chempness, 85), Vud, Garbett (Jast, 79).
Ogohlantirishlar: Bell (19), Stensness (55), Garbett (64), Kakase (71), Tomiyasu (89), Miyosi (114).

Bu Olimpiadaning futbol bo‘yicha musobaqalari ilk bor Osiyoda o‘tkazilgan Jahon chempionatini yodga solib yubordi. O‘shanda mezbonlar ikki davlat bo‘lgan, ammo ikki mezbon - Yaponiya va Janubiy Koreya sinxron tarzda pley-offga chiqib, muvaffaqiyatli ishtirok etishgandi. O‘shanda yarimfinalga koreyaliklar yetib borishgandi, bu safar esa «Ko‘k samuraylar»ning navbati keldi.

Yaponlar nisbatan oson kechgan guruh bosqichida barcha gollarini urib bo‘lgandek. Ish shungacha yetdiki, Endo burchak tomondan bir yarim metrdan turib darvozani ishg‘ol etolmadi, Ueda esa darvoza ro‘parasidan bergan zarba darvozabonga bordi. Lekin o‘yindan keyingi penaltilar seriyasida mezbonlar a'lo darajada harakat qilishdi, Tani bir zarbani qaytardi, yangi zelandiyaliklarning yana bir zarbasi xato ketdi.

Janubiy Koreya – Meksika 3:6
Gollar: 0:1 – 12 Martin, 1:1 – 20 Li Don Gen, 1:2 – 29 Romo, 1:3 – 39, penalti Kordova, 2:3 – 51 Li Don Gen, 2:4 – 54 Martin, 2:5 – 63 Kordova, 2:6 – 84 Agirre, 3:6 – 90 Hvang Uy Jo.
Janubiy Koreya U-23 – Son Bom Gin, Pak Ji Su (Kim Je U, 81), Sol Yen U, Jon The Uk, Kan Yun Son (Om Von San, 46; Li Kan In, 73), Kim Don Xen (Kvon Chhang Hun, 46), Kim Jin Ya, Li Don Gen, Kim Jin Gyu (Von Du Je, 46), Li Don Jun, Hvang Uy Jo.
Meksika U-23 – Ochoa, Eskivel, Montes, Sanches, Romo, Antuna (Laynes, 72), Kordova (Beltran, 73), Loronya, Vaskes (Angulo, 80), Vega (Angulo, 78), Martin (Agirre, 78).
Ogohlantirishlar: Vaskes (32), Jon The Uk (34), Kan Yun Son (38), Von Du Je (49), Sanches (76), Angulo (90).

Guruh bosqichidagi oxirgi ikki o‘yinda 10 gol urgan koreyaliklar ham kuchsiz guruhdan joy olishgandi. Meksika — esa butunlay boshqacha daraja. Ha, osiyoliklar «Atsteklar» himoyasini bosim ostida ushlab turishdi, Li Don Gen bu o‘yinda qator seyvlar amalga oshirgan 36 yoshli Ochoa qo‘riqlagan darvozani ikki bor ishg‘ol etdi, ammo meksikaliklarning hujum chizig‘i koreyslarning himoyasidan ancha kuchliligi ma'lum bo‘ldi. Ayniqsa yarimhimoyachilar Romo va Kordova ideal darajada o‘yin ko‘rsatishdi, ular olti goldan uchtasiga mualliflik qilishdi, Martinning ikki goliga bir martadan assistentlik qilishdi. Bunday Meksika yarimfinalda Braziliyaga jiddiy muammo yaratishi turgan gap.

1/2 final uchrashuvlari 3 avgust kuni o‘tkaziladi:
13.00. Meksika — Braziliya
16.00. Yaponiya — Ispaniya