O‘zbekiston | 15:17 / 12.08.2021
30997
2 daqiqa o‘qiladi

To‘rt viloyatda bittadan tumanda yangi hokim ish boshladi

12 avgust kuni Buxoro viloyatining G‘ijduvon, Sirdaryo viloyatining Guliston, Xorazm viloyatining Xiva va Samarqand viloyatining Payariq tumanlarida rahbarlar almashdi. Guliston va Payariqda to‘rt sektor rahbari ham ishdan ketgan.

Buxoro viloyati hokimi Botir Zaripov ishtirokida G‘ijduvon tumanida o‘tkazilgan sessiyada Murodjon Umarov tuman hokimligidan ozod etildi.

Muqaddam viloyat hokimi o‘rinbosari lavozimida ishlagan Umarov 2016 yilda G‘ijduvon tumani hokimligiga tayinlangandi.

Murodjon Umarov

Uning o‘rnida 2018 yildan buyon Buxoro viloyati davlat soliq boshqarmasi boshlig‘i lavozimida ishlab kelgan Sherzod Ashurov ish boshladi.

Sherzod Ashurov

Sirdaryo viloyati hokimi G‘ofurjon Mirzayev ishtirokida Guliston tumanida o‘tkazilgan sessiyada Shavkat G‘ofurov tuman hokimligidan olindi.

G‘ofurov 2018 yil 18 oktyabrdan buyon Guliston tumanini boshqarib kelayotgandi. U bilan birga to‘rt sektor rahbari - prokuror, IIB va DSI boshliqlari ham ishdan ketgan va ularning o‘rniga yangilari tayinlangan.

Shavkat G‘ofurov

Endilikda tumanga 2012 yildan buyon Tovar-xomashyo birjasi Sirdaryo viloyati filiali direktori lavozimida ishlab kelgan Saydimqul Begimqulov rahbarlik qiladi.

Saydimqul Begimqulov

Xorazm viloyati hokimi Farhod Ermanov ishtirokida Xiva tumanida o‘tkazilgan sessiyada Ozod Matyoqubov tuman hokimi lavozimidan ozod etildi.

Muqaddam sobiq Qishloq va suv xo‘jaligi vazirligida ishlagan Matyoqubov 2017 yil yozidan buyon Xiva hokimi edi.

Ozod Matyoqubov

Uning o‘rniga viloyat bandlik bosh boshqarmasi boshlig‘i vazifasida ishlab kelgan Hurmat Matrasulov yangi hokim etib tayinlandi.

Hurmat Matrasulov

Samarqand viloyati hokimi Erkinjon Turdimov ishtirokidagi sessiyada Payariq tumanida to‘rtlik ishdan olindi.

2019 yildan buyon tumanga rahbarlik qilib kelgan Dilshod Musinov hamda tuman prokurori, tuman bosh militsioner va tuman bosh soliqchisi ishdan ketgan.

Dilshod Musinov

Samarqand viloyati qishloq xo‘jaligi boshqarmasi boshlig‘i vazifasida ishlab kelgan Zafar Ergashev Payariq tumani hokimi etib tasdiqlandi.

Zafar Ergashev

Mavzuga oid