Президент экология муаммоларига бағишланган йиғилишда чиқиндиларни йиғиш ва қайта ишлаш масаласига ҳам тўхталиб ўтди. Бу борада давлат-хусусий шериклик йўлга қўйилган жойларда тартиб яхшиланган.
«Чиқиндиларни йиғиш ва қайта ишлаш бўйича йўл қўйилган қолоқликлар йил якунига қадар бартараф этилиши шарт. Мисол учун, Наманган шаҳар, Тўрақўрғон, Мингбулоқ ва Наманган туманларида хусусий шериклик тизими тўлиқ ўзини оқлаган. Жумладан, ушбу ҳудудларда аҳолини санитар тозалаш хизматлари билан қамраб олиш даражаси, ўтган 6 ойда 79 фоиздан 92 фоизга етиб, тушумлар 2 бараварга ошган.
Ёки Фарғонада ҳам хусусий шериклар томонидан 7 миллиард сўмлик инвестиция жалб қилиниб, водийда илк бор чиқиндиларни саралаш заводи ишга туширилган.
Энди ҳудудларда чиқинди масаласи билан вилоят ҳокимлари шахсан шуғулланади, сўров ҳам улардан бўлади», деди давлат раҳбари.
Вилоят ҳокимлари келгуси йилда соҳада хусусий сектор улушини 60 фоизга етказиш ва 6,5 мингта янги иш ўринлари яратишга шахсан масъул бўлади.
«Яна бир масала – тиббиёт чиқиндиларини қайта ишлашга ҳам хусусий шерикларни жалб қилиб, 27 минг тонна хавфли тиббиёт чиқиндиларини йўқ қилишни йўлга қўйиш зарур.
Уч ой муддатда тиббиёт чиқиндиларини қайта ишлашда камида 5 та хусусий шерикларни аниқлаб, лойиҳаларни бошлансин. Экология соҳасида илм ва инновацияларни ривожлантириш зарур», деди президент.
Илм ва инновациялар ҳар бир соҳада зарур. Лекин бугунги кунда Экология қўмитаси тизимидаги 2 мингдан ортиқ ходимларнинг атиги 10 фоизи мутахассис ҳисобланади.
Шу боис, қўмита ҳузуридаги илмий-тадқиқот институти фаолиятини такомиллаштириш, олимлар ва кадрлар тайёрлашни ривожлантириш бўйича кўрсатмалар берилди.
Бунинг учун мазкур илмий-тадқиқот институти замонавий техника ва лаборатория ускуналари билан жиҳозланади. Докторантурага квоталар 2 баравар оширилади. Институтда экология ва атроф-муҳит муҳофазаси бўйича илмий даражаларни берувчи Илмий кенгаш ташкил этилади.
