15:41 / 09.09.2021
13836
Сурхондарёда йўл ҳаракати қоидасини бузиб ҳаракатланган юк машинасини электровоз уриб юборди

Сурхондарё вилояти Қумқўрғон туманида йўл ҳаракати қоидасини бузиб ҳаракатланган юк машинасини электровоз уриб юборган. Бу ҳақда ИИВ ЙҲХББ хабар бермоқда.

Маълум қилинишича, бугун 9 сентябрь куни соат 9:20ларда Қумқўрғон тумани, «Азларсой» МФЙ ҳудудидан ўтган темирйўл кесишмасида юк машинаси ва электровоз иштирокида йўл-транспорт ҳодисаси содир бўлган.

Фуқаро А.Й. бошқарувидаги №0203-рақамли электровоз ҳамда ҳайдовчи Б.Б. бошқарувидаги HOWO русумли юк машинаси ўзаро тўқнашган. Тўқнашувда юк машинаси ағдарилиб кетган ва йўл четидаги темирйўлни электр энергияси билан таъминлаш учун ўрнатилган устунга зарар етказган. Оқибатда юк машинаси ҳайдовчиси тан жароҳати билан шифохонага олиб кетилган.

Қайд этилишича, ҳодиса жойига туман ИИБ тезкор тергов гуруҳи чиқиб, воқеа тафсилотларини ўрганган ва ҳолат ўрнатилган тартибда расмийлаштирилган.

Дастлабки суриштирувда аниқланишича, юк машинаси ҳайдовчиси бошқарув пайтида эътиборсизлик қилган ва темирйўл кесишмасидаги тўхташ белгисига амал қилмасдан ҳаракатланган.

Эслатиб ўтамиз, аввалроқ Шўрчи туманида ҳам йўл ҳаракати қоидаларини бузиб ҳаракатланган «ЗИЛ» юк машинаси тепловоз билан тўқнашган ва ҳайдовчиси вафот этган эди.

Top