Qashqadaryoda viloyat asab-ruhiy kasalliklari dispanserida qonunga zid ishlar bo‘layotgani aytildi

Ijtimoiy tarmoqlarda Qashqadaryo viloyat asab-ruhiy kasalliklari dispanserining bir guruh tibbiyot xodimlari tomonidan mazkur shifoxonada qonunga zid ishlar bo‘layotgani aytilgan xabarlar tarqaldi. Viloyat Sog‘liqni saqlash boshqarmasi axborot xizmati mazkur xabarlar yuzasidan munosabat bildirdi.

Munosabatda ma'lum qilinishicha, Qarshi shahrida joylashgan viloyat 1-son asab-ruhiy kasalliklar dispanserining bir guruh tibbiyot xodimlari ijtimoiy tarmoqlar orqali Bosh prokuror nomiga murojaat bilan chiqqan.

Ular o‘z murojaatida mazkur shifoxonada ayrim qonunga zid ishlar bo‘layotgani haqida ma'lum qilgan. Jumladan, dispanserda bir shtatga 5-6 nafardan xodim to‘g‘ri kelsa-da, yana yangi xodimlar ishga olinayotgani, tashqi o‘rindosh xodimlar orasida «o‘lik jon»lar mavjudligi, vrach-stomatolog muassasaning tibbiy uskunalaridan foydalangan holda aholiga pullik xizmat ko‘rsatayotgani, dori-darmon va oziq-ovqat ta'minotida ham muammolar borligi aytilgan.

Qayd etilishicha, mazkur murojaat viloyat Sog‘liqni saqlash boshqarmasi tomonidan nazoratga olingan va holat bo‘yicha o‘rganish ishlari olib borilmoqda.

«Mazkur murojaat boshqarmamiz tomonidan tegishli tartibda nazoratga olindi. Bu borada mutasaddi idoralar hamkorligida o‘rganish ishlari olib borilmoqda. O‘rganish yakuni bo‘yicha ma'lumotlar e'lon qilinadi», deyiladi munosabatda.