So‘nggi vaqtlarda o‘zbekistonliklar o‘rtasida daromad olish maqsadida sport o‘yinlariga pul tikuvchilar soni sezilarli darajada ortgan. O‘yinda yutqazib, uy va mol-mulklarini sotgan, jinoyatga qo‘l urgan va hatto o‘z joniga suiqasd qilganlar haqida ko‘plab xabarlar tarqalmoqda. Shunga qaramay, O‘zbekistonda bu turdagi o‘yinlarni qonuniylashtirish borasida harakatlar davom etmoqda.
Sport o‘yinlariga pul tikishni legallashtirish hech kimga naf keltirmaydi, deydi sport jurnalisti Jamoliddin Bobojonov. Uning ta'kidlashicha, totalizator kompaniyalari to‘laydigan soliq – professional sport uchun arzimagan pul, bu ishlar bilan shug‘ullanuvchi mutaxassislarning birortasi totalizatorni qonuniylashtirish ortidan katta pullar sportga kelmasligini aytgan.
Kazino hech qachon yutqazmaydi deganlaridek, bukmekerlar ham hech qachon yutqazmaydi, deydi u.
“Bizga eng yaqin Rossiya misolida olib qarasak, reklama beruvchilar ko‘proq pul topyapti xolos. Professional futbolga yoki sportning boshqa turlariga katta daromad olib kelmayapti. Holbuki, aholisi biznikidan ko‘p va katta qismi musulmon bo‘lmagan mamlakat, shuningdek, ularning e'tiqodi, dunyoqarashi jihatidan ham to‘sqinlik yo‘q. Lekin professional sportga totalizator orqali katta mablag‘lar kirib bormaydi.
O‘zimizga keladigan bo‘lsak, buni legallashtirish bilan sportga pul tikib qimor o‘ynayotganlar sonini ko‘paytiramiz. Undan na davlatga, na sportga, na yoshlar tarbiyasiga biron-bir naf yo‘q. Kimdir bu pullarni professional sportga yo‘naltiramiz, qo‘shimcha pul desa, katta xato qilgan bo‘ladi, nazdimda.
