Uyushgan jinoyatchilik darajasi bo‘yicha davlatlar reytingi e'lon qilindi. O‘zbekiston ro‘yxat o‘rtasida

Reyting mualliflari davlatlarni 3 mezon bo‘yicha baholashgan:

• kriminal bozorlarning ko‘lami va ta'siri;
• jinoyatchilikning 4 turi (mafiya, jinoiy tarmoqlar, davlat organlariga kirib olgan jinoiy tuzilmalar va xorijiy jinoiy tuzilmalar) strukturasi va ta'siri;
• davlatlarning uyushgan jinoyatchilikka bardoshliligi.

Davlatlar har bir mezon bo‘yicha 1 dan 10 ballgacha baholangan, bunda 1 ball past darajadagi jinoyatchilik, hukumatning jinoiy doiralarga qarshilik ko‘rsatishga yuqori tayyorgarligini anglatadi.

Reytingda 193 ta davlatdan 1-o‘rinni Kongo Demokratik Respublikasi egallagan (7,75 ball). 2-o‘ringa Kolumbiya (7,66), 3-o‘ringa esa Myanma (7,59) qo‘yilgan. Shuningdek, antireytingning yuqori o‘ntaligiga Meksika, Nigeriya, Eron, Afg‘oniston, Iroq, MAR va Honduras kirgan.

O‘zbekiston ro‘yxatda 4,96 ball bilan 90-o‘rinni egallagan.

Shuningdek, Markaziy Osiyo davlatlaridan Tojikiston 62-o‘rinni (5,61), Qirg‘iziston 72-o‘rinni (5,33), Turkmaniston 113-o‘rinni (4,61) va Qozog‘iston 133-o‘rinni (4,26) egallagan. 

Uyushgan jinoyatchilik eng past darajada bo‘lgan davlat sifatida Tinch okeanidagi Tuvalu davlati e'tirof etilgan. U 1,54 ball bilan reytingning oxirgi pozitsiyasidan joy olgan.