Asadxo‘ja Mo‘ydinxo‘jayev jahon chempionatini g‘alaba bilan boshladi, bugun yana uch bokschi ringga chiqadi

O‘zbekiston terma jamoasi sharafini -67 kg vazn toifasida himoya qilayotgan Asadxo‘ja Mo‘ydinxo‘jayev ishtirokini saralashdan boshladi. U 1/32 final doirasida irlandiyalik Brendon Makkiverga qarshi ringga ko‘tarildi va hakamlar jang yakuniga ko‘ra Asadxo‘janing 5:0 hisobidagi g‘alabasini qayd etdi.

Shu tariqa, Asadxo‘ja Mo‘ydinxo‘jayev 1/16 finalga yo‘llanmani qo‘lga kiritdi.

Bugun jahon chempionatining ikkinchi kunida yana uch nafar o‘zbekistonlik sportchi musobaqada o‘z ishtirokini boshlaydi.

Rio Olimpiadasi chempioni Hasanboy Do‘stmatovga 1/8 finalda Tokio Olimpiadasi bronza medali sovrindori, qozog‘istonlik Saken Bibossinov raqib bo‘ladi. -75 kg vazn toifasida 2021 yilgi Osiyo chempioni Saidjamshid Ja'farov va bir necha bor O‘zbekiston chempioni bo‘lgan Odiljon Aslonov ham jahon chempionatidagi debyutini o‘tkazadi.

• -80 kg. Odiljon Aslonov — Yusuf Changalave (Tanzaniya) – 19:30;
• -51 kg. Hasanboy Do‘stmatov — Saken Bibossinov (Qozog‘iston) – 21:00;
• -75 kg. Saidjamshid Ja'farov — Lukas Fernetsa (Slovakiya) – 23:10.