Oktyabr oyida narxlar 1,3 foizga qimmatlashdi

Davlat statistika qo‘mitasi oktyabr oyidagi inflatsiya darajasini e'lon qildi. Bu oyda O‘zbekistonda narxlar 1,3 foiz qimmatlashgan, yillik inflatsiya esa 10,6 foizni tashkil qilmoqda.

Oylik inflatsiya biroz tezlashgan, biroq yillik inflatsiya darajasi sentyabrdagi 10,8 foizdan 10,6 foizgacha pasaygan.

2021 yilning oktyabr oyida narxlar va tariflar oshishi bo‘yicha yetakchilik oziq-ovqat mahsulotlariga tegishli bo‘ldi. Oy davomida ularning narxi o‘rtacha 1,9 foizga qimmatladi. Ushbu davrda nooziq-ovqat mahsulotlar narxlari 1,1 foizga, aholiga pullik xizmatlar narxi 0,5 foizga oshdi.

Taqqoslash uchun, o‘tgan 2 yil ichida ham narxlar oshishi borasida oziq-ovqat narxlari yetakchilik qilgan. Oziq-ovqat 2019 yil 2,3 foiz, 2020 yilda esa 2,8 foizga qimmatlagan. 

Yillik nisbatda esa oziq-ovqat narxlari 14 foizga o‘sgan. Bu yil 2019-2020 yillarga nisbatan oziq-ovqat narxlari o‘sishi sekinlashganini ko‘rish mumkin, o‘tgan yil narxlar oshishi bo‘yicha yetakchi bo‘lgan oziq-ovqat narxlari 17 foizga, 2019 yilda esa 19,5 foizga qimmatlashgan.

Eslatib o‘tamiz, sentyabrda tovar va xizmatlar 1,1 foizga qimmatlashgandi.

Shuningdek, Markaziy bank boshqaruvining 21 oktyabrdagi yig‘ilishida oziq-ovqat va yonilg‘i narxlarining oshishi inflatsiya pasayishiga to‘sqinlik qilgani ma'lum qilingandi.