08:04 / 02.11.2021
9433
Илон Маск 300 миллиард доллардан кўпроқ бойликка эга биринчи одамга айланди - Forbes

Америкалик тадбиркор Илон Маск инсоният тарихида бойлиги 300 млрд доллардан ошган биринчи одамга айланди. Бундан реал вақтда янгиланиб турувчи Forbes Real-Time миллиардерлар рўйхати маълумотлари дарак бермоқда.

Фото: AP Photo/Chris Pizzello

Маск янги рекорд қийматга ўзи асос солган Tesla компанияси акциялари нархи бир ҳафтадан бери жадал кўтарилаётгани эвазига эришди. Компания акциялари нархи автомобилларни ижарага берувчи Hertz компанияси Tesla билан 100 мингта электромобил сотиб олиш бўйича битим тузганидан кейин кўтарилмоқда. 

1 ноябрдаги биржа савдолари очилгандан 2 соат ичида компания акциялари нархи 1150 долларга кўтарилиши эвазига Маск яна 10 млрд долларга бойиган ва янги рекордни ўрнатган.

Ўтган ҳафта Маск бойлиги илк бор 270 млрд долларга етгандан кейин энг бадавлатлар одамлар рейтинги юритилиши тарихидаги энг бой одамга айланган.

Ўз навбатида 29 октябрда Bloomberg ахборот агентлиги миллиардернинг бойлиги тўрт кун ичида 50 млрд долларга кўпайиб, 302 млрд долларга етганини маълум қилганди.

Миллиардернинг Tesla’даги 21 фоизлик улуши унинг бойлигининг асосий қисми ҳисобланади. Бундан ташқари, у ўзи асос солган яна бир компания – SpaceX’да кичик улушга эга.

25 октябрда Tesla капиталлашуви Hertz билан битим тузилгани эълон қилиниши ортида илк бор 1 трлн доллардан ошди. Bloomberg ахборот агентлигининг манбалари ушбу битим Маск компаниясига 4,2 млрд доллар келтиришини айтишган. Hertz буюртирган машиналар компания бир йилда ишлаб чиқарадиган машиналарнинг ўндан бир қисмини ташкил қилади.

Top