Olmaliq shahar mudofaa ishlari bo‘limi boshlig‘i deyilayotgan shaxs ayol kishiga qo‘l ko‘targani tasvirlangan video tarqaldi. Toshkent harbiy okrugi qo‘mondonligi va Harbiy prokuratura tekshiruv boshlagan.
Ijtimoiy tarmoqlarda Olmaliq shahar mudofaa ishlari bo‘limi boshlig‘i deya aytilayotgan harbiy kiyimdagi shaxs ayol kishiga qo‘l ko‘targani aks etgan video tarqaldi. Voqea Olmaliq shahri buyum bozorida ro‘y bergani aytilmoqda.
Mudofaa vazirligi Axborot va ommaviy kommunikatsiyalar departamentining Kun.uz'ga ma'lum qilishicha, hozirda holat yuzasidan Toshkent harbiy okrugi qo‘mondonligi va Harbiy prokuratura surishtiruv ishlarini boshlagan.
“Tekshiruv natijasi yuzasidan qo‘shimcha xabar beriladi. Holat Mudofaa vazirligi tomonidan nazoratga olingan”, deyiladi vazirlik munosabatida.
Eslatib o‘tamiz, shu yil aprel oyida Olmaliq shahar davlat soliq inspeksiyasi xodimlari sotuvchi ayolni sudragan, voqea videosi internetda tarqalgach, 11 nafar soliqchi ishdan bo‘shatilgandi.
