Bolalarni qo‘llab-quvvatlash fondiga 100 mlrd so‘m ajratiladi

Hujjatda qayd etilishicha, Sog‘liqni saqlash vazirligi rasmiy sayti ma'lumotlariga ko‘ra, 2019 yil 1 iyul holatida mamlakatda nogiron bolalar soni 111 850 nafarni tashkil etadi. Bu ko‘rsatkich har 1000 nafar bolaga 10,5 nafarni tashkil etadi. Har bir nogiron bola doimiy ravishda ijtimoiy va psixologik ko‘makka muhtoj hisoblanadi.

“O‘z navbatida, so‘nggi yillarda bolalar orasida onkologik kasalliklar kuzatilayotgani tashvishli holat. Ushbu kasallikni davolash katta xarajatlar bilan bog‘liqligi bois har bir bemor bola alohida ko‘makka muhtoj hisoblanadi.

Qayd etilganlarga asosan, qonun loyihasida tashkil etilishi ko‘zda tutilgan Bolalarni qo‘llab-quvvatlash jamoat fondi faoliyati ijtimoiy himoyaga muhtoj bolalarni qo‘llab-quvvatlashga qaratilgan”, deyiladi loyihada.  
 
Qonun loyihasida fondni tashkil etish maqsadi, fond faoliyatining asosiy prinsiplari, huquq va majburiyatlari, fond faoliyatini davlat tomonidan qo‘llab-quvvatlash va rag‘batlantirish, fond boshqaruv organlari, uning faoliyati ochiqligini ta'minlash, fond faoliyatining moliyaviy asoslari kabi masalalar tartibga solinishi belgilangan. 

Qonun loyihasining qabul qilinishi fond faoliyati doirasida bemor, nogiron, yetim va yordamga muhtoj bolalarga yordam berish va ularni qo‘llab-quvvatlash ishlarini yanada kuchaytirishga xizmat qiladi.

Prezidentning 2021 yil 4 oktyabrdagi PQ–5255-son qarori 5-bandida fondga davlat budjeti hisobidan 2021-2022 yillarda mablag‘larni amalda o‘zlashtirilishiga qarab 100 milliard so‘m miqdoridagi beg‘araz moliyaviy yordam ajratilishi belgilangan.