Samarqandda qo‘shni ayolni pichoqlagan erkakka hukm o‘qildi

Ma'lum qilinishicha, Urgut tumanida yashovchi erkak bosqinchilik qilish maqsadida qo‘shni hovliga kirgan. Qo‘shni ayol I.I. payqab qolgach unga pichoq bilan tashlangan. U ayolga bolalarning ko‘z o‘ngida 17 marta pichoq urgan. So‘ng uyiga ketgan.

Og‘ir tan jarohatlari olgan ayolga tez tibbiy yordam ko‘rsatilgan va uning hayoti saqlab qolingan. O‘ziga kelgan ayol pichoq urgan shaxsni qo‘shnisiga o‘xshatganini aytgan. Shundan so‘ng, gumondor shaxs qo‘lga olinib unga nisbatan jinoyat ishi qo‘zg‘atilgan.

Dastlabki surishtiruvda gumondor shaxs spirtli ichimlik ta'siri ostida bo‘lgani ma'lum bo‘lgan va u mastlikda qo‘shnisining uyiga bosqinchilik qilish uchun kirganini va buni avvaldan rejalashtirib kelganini tan olgan.

Jinoyat ishlari bo‘yicha Toyloq tumani sudida mazkur jinoyat ishi yuzasidan bo‘lib o‘tgan sud majlisida erkakka hukm o‘qilgan. Jinoyat ishi bo‘yicha to‘plangan hujjatlar, shuningdek guvohlar va ayblanuvchining ko‘rsatmalarini eshitib sud 41 yoshli D.M.ni Jinoyat kodeksining 97-moddasi «j» va «i» bandlari, 164-moddasi 3-qismi «v» va «g» bandlarida nazarda tutilgan jinoyatlarni sodir etgan deb topgan va 16 yil 6 oy ozodlikdan mahrum qilish jazosini tayinlagan.