Buxoroda 1 700 dollar evaziga fuqaroni o‘qishga kiritmoqchi bo‘lgan shaxs ushlandi

Buxoroda o‘qishga kiritish bilan bog‘liq firibgarlik holati fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda. 

Ma'lum qilinishicha, fuqaro M.A. boshqa bir fuqaro S.ni tanishlari yordamida Toshkent moliya institutiga ikkinchi mutaxassislik bo‘yicha o‘qishga kiritib qo‘yish evaziga 1 700 AQSh dollari so‘ragan. U kelishilgan pulni firibgarlik yo‘li bilan olgan vaqtida departamentning Buxoro viloyat boshqarmasi tomonidan o‘tkazilgan tezkor tadbirda ashyoviy dalillar bilan ushlangan.

Holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda. 

Oldinroq 2 000 AQSh dollari evaziga Buxoro davlat universitetiga o‘qishga kiritmoqchi bo‘lgan shaxs ushlangandi.