1 dekabr kuni Rossiya nashrlarida Namanganning «Navbahor» klubi sobiq bosh murabbiyi Andrey Kanchelskisga noma'lum shaxslar tomonidan tahdidlar bo‘lgani haqida xabarlar tarqaldi. Mutaxassisning ma'lum qilishicha zo‘ravonlar undan FIFA orqali o‘zbek klubidan undirmoqchi bo‘layotgan 1,6 million yevro mablag‘ masalasida talabini pasaytirishni, aks holda uni mayib qilishlarini aytib, qo‘rqitishgan. Ushbu mojaroli vaziyat Rossiya futbol hayotidagi asosiy voqeaga aylanmoqda.
O‘zi nima bo‘lgan edi?
2020 yilda Kanchelskis maoshlar masalasidagi qarzdorlikdan so‘ng Namangan klubini tark etgandi. Ko‘p o‘tmay, u FIFAga bu masalada murojaat qilgach, futboldagi bosh tashkilot «Navbahor»dan rossiyalik murabbiy foydasiga jami 1,6 million yevro miqdoridagi tovon puli va qarzdorlikni undirish haqida qaror chiqargan.
22 noyabr kuni kechga yaqin Moskvadagi «Oazis» restoranida ovqatlanayotgan Kanchelskis yoniga uch nafar noma'lum shaxs kelib, undan O‘zbekistonda ishlagani va 80 ming AQSh dollari miqdorida to‘lov qilish bo‘yicha taklif olgani haqida so‘rashadi. Ungacha esa aynan shuncha mablag‘ bilan masalaga nuqta qo‘yish haqida «Navbahor» klubi prezidenti Kanchelskisga taklif bilan chiqqan edi.
«Siz sudga berdingiz. Endi hech narsa ololmaysiz! Agar shu mablag‘ga (80 ming AQSh dollari) rozi bo‘lmasangiz, bir umrga mayib bo‘lasiz. Oyog‘ingni sindiramiz, aravachada yurasan», deya gumondagi shaxslardan birining so‘zlarini keltiradi «Mutko protiv» Telegram-kanali kuzatuv kameralaridagi videoni keltirib.
«Navbahor» sobiq ustozi tahdidlardan so‘ng politsiyaga murojaat qilgan. Qayd etilishicha, Kanchelskisni anchadan buyon kuzatishgan. Restoran ishchilarining so‘zlariga ko‘ra, bu shaxslar bu yerga oldin ham bir necha marta kirib, rossiyalik murabbiyni shu yerdan izlashgan.
«Taklifdan bosh torsam, oyoq va qo‘llarimni sindirishlarini aytishdi»
Kanchelskis «SE» bilan suhbatda bo‘lgan voqealarni aytib berdi.
«Politsiyaga murojaat qilganimiz rost. Ammo bu ma'lumot qanday qilib OAVda paydo bo‘lgani qiziq. Organlarimiz qanday ishlashi men uchun tushunarsiz. Barcha tahdidlar FIFA va UYeFAga yetkaziladi. Bu ish bilan hozir jiddiy shug‘ullanishimiz kerak. Politsiyadan hozircha olganimiz – ushbu ma'lumotni kutilmaganda tarqalishi bo‘ldi, boshqa hech qanday reaksiya bo‘lgani yo‘q. O‘ylaymanki, tez orada ma'lumot ko‘proq bo‘ladi. Bu kimsalarni tezroq topib, qonun doirasida chora ko‘rishlarini xohlayman.
