Endokrinologiya markazi faoliyati ko‘p tarmoqli shaklga o‘tkaziladi

Prezident Shavkat Mirziyoyev raisligida endokrin kasalliklarning oldini olish, ularni erta aniqlash va davolash tizimini takomillashtirish chora-tadbirlari yuzasidan videoselektor yig‘ilishi bo‘lib o‘tmoqda.

"Afsuski, respublikada endokrin kasalliklarini barvaqt aniqlash va davolashga 25 yil davomida e'tibor susayib ketgani ham adolatli haqiqat", dedi davlat rahbari so‘zining avvalida.

Kun.uz muxbiri xabariga ko‘ra, yig‘ilishda keyingi yillarda sohada qilingan ishlar sanab o‘tildi. Jumladan, so‘nggi uch yilda endokrinologiya sohasini takomillashtirishga qaratilgan alohida dastur amalga oshirildi, endokrinologiya markazining 14 ta filiali moddiy-texnika bazasini mustahkamlash uchun 3,5 million dollar ajratildi, filiallarda maxsus bo‘limlar tashkil etilib, respublika markaziga murojaatlar 2 barobarga kamaydi, ya'ni qariyb 5 ming nafar fuqaroning sarsongarchiligi va ortiqcha xarajatlarining oldi olindi, har yili 80 ming nafar bemor insulin bilan bepul ta'minlanmoqda.

Hozirda Respublika endokrinologiya markazi uchun eng zamonaviy uskunalar bilan jihozlanadigan 600 o‘rinli yangi bino qurilmoqda. Prezident topshirig‘iga ko‘ra, markaz faoliyati ko‘p tarmoqli shaklga o‘tkaziladi.