Tibbiyot muassasalarida laboratoriya xizmatlari ko‘rsatishning mutlaqo yangi tizimi joriy etiladi - Prezident

Kun.uz muxbiri xabariga ko‘ra, davlat rahbari tibbiyot muassasalarida laboratoriya xizmatlari ko‘rsatishning mutlaqo yangi tizimi joriy etilishini ma'lum qildi.

Bunda:

- ikki oy muddatda laboratoriya tahlillari normativlari xalqaro tajriba asosida to‘liq qayta ko‘rib chiqilib, yangilanadi;

- tumanlarda oilaviy va markaziy poliklinika, markaziy shifoxona hamda shoshilinch tibbiy yordam bo‘limi laboratoriyalari maqbullashtirilib, tun-u kun ishlaydigan markaziy laboratoriyalar tashkil etiladi;

- ularga oilaviy poliklinika va shifokor punktlaridan materiallarni yig‘ib olish uchun transport vositalari olib beriladi;

- kelgusi yil davomida markaziy laboratoriyalardagi 1 mingdan ziyod shifokorlar va 3 mingdan ortiq o‘rta tibbiyot xodimlarining malakasi oshiriladi.

Davlat rahbari laboratoriya tahlillariga xususiy sektorni jalb qilish bo‘yicha ijobiy tajribani joriy qilish masalasiga to‘xtaldi.

Mirzo Ulug‘bek, Yunusobod va Oqoltin tumanlari tibbiyot birlashmalari tarkibida bo‘lgan shifoxona va poliklinikalarga qarashli laboratoriyalar autsorsing asosida xususiy sektorga berilgan.

Xususiy laboratoriya tahlillar uchun biomateriallarni o‘zi maxsus transport orqali yig‘ib, ularning natijalarini elektron tizim orqali shifokorlarga taqdim qilmoqda.

Natijada, davlat tibbiyot muassasalarida bir oyda o‘rtacha 20 mingta tahlil o‘tkazilgan bo‘lsa, xususiy laboratoriya tomonidan bu ko‘rsatkich 30 mingtaga yetkazilgan.

Shularni inobatga olib, Toshkent shahrining barcha tumanlari, Toshkent viloyatining 5 ta tumani, boshqa viloyatlarda bittadan tuman va shaharda 2022 yil davomida ushbu tajribalarni sinovdan o‘tkazish topshirig‘i berildi.