Qoraqalpog‘istonda brakonerlar 14 bosh jayronni ovladi

Taxtako‘pir tumanida 14 bosh jayron va 5 dona yovvoyi quyonlarni ovlagan brakonerlar qidirilmoqda. Bu haqda Qoraqalpog‘iston Respublikasi ekologiya qo‘mitasi xabar berdi.

Ma’lum bo‘lishicha, 12 dekabr kuni Ekologiya qo‘mitasining Nukus shahar, Taxiatosh, Taxtako‘pir tumani inspektorlari Taxtako‘pir tumanida tezkor reyd tadbirini o‘tkazgan. Unda soat taxminan 14:00larda Taxtako‘pir tumani "Qonyratkol" OFY cho‘l hududida inspektorlar tomonidan noma’lum shaxslar “Uaz 469” rusumli rangi kulrang avtomashina bilan turganligi aniqlangan.

Noma’lum shaxslar inspektorlarning yaqinlashayotganligini ko‘rib, voqea joyidan yashiringan. Inspektorlar noma’lum shaxslarning 5 km masofagacha izidan borgan. Shunga qaramay brakonerlar inspektorlardan qochib ketishga ulgurgan.

Taxtako‘pir tumani cho‘l zonasining “Tasbergen” kran atrofida inspektorlar tomonidan noma’lum shaxslar turgan joy ko‘zdan kechirilganda voqea joyiga otilgan patron gilzasi, idish-tovoq, xo‘jalik buyumlari bo‘lgan pichoq, bolta, yoqilg‘i, kiyim-boshlar hamda “Qizil kitob”ga kiritilgan 14 bosh jayron, 5 dona yovvoyi quyon jasadlari tashlab ketilgani aniqlangan.

Davlat inspektorlari tomonidan ushbu holat yuzasidan tegishli tartibda dalolatnoma tuzilib, voqea joyi videotasvirga olingan.

Mazkur holat yuzasidan Orol tabiatni muhofaza qilish prokuraturasi tomonidan tergovga qadar tekshirish harakatlari olib borilmoqda.

Bundan oldin Ustyurt tekisligida 11 bosh jayronni ovlagan brakonerlar 4 yil muddatga qamalgandi.

UPD: Bosh prokuratura mazkur holat yuzasidan Orol tabiatni muhofaza qilish prokuraturasi tomonidan tergovga qadar tekshirish harakatlari olib borilayotgani, natijasi haqida qo‘shimcha xabar qilinishini ma’lum qildi.