19 avgust kuni Qo‘riqlash Departamentining Aydar-Arnasoy ko‘llar tizimini muhofaza qilish boshqarmasi xodimlari tomonidan o‘tkazilgan nazorat tadbirida ko‘l hududida rezina qayiqda taqiqlangan ov quroli elektr qarmoq yordamida noqonuniy ravishda baliq ovlayotgan brakonerlar qo‘lga olindi. Bu haqda Qo‘riqlash Departamenti xabar berdi.
“Qayiq dastlabki ko‘zdan kechirilganda unda 54 dona 2 xil turdagi baliq mahsulotlari borligi aniqlandi. Ovlangan baliq mahsulotlari hududga xizmat ko‘rsatuvchi MChJga topshirildi”, deyiladi xabarda.
Ta’kidlanishicha, noqonuniy baliq ovlash natijasida tabiatga keltirilgan zarar 1 mlrd 112 mln so‘mni tashkil qiladi.
Hozirda holat bo‘yicha hujjatlar rasmiylashtirilib, ko‘rib chiqish uchun prokuratura organlariga jo‘natish choralari ko‘rilmoqda.
