Bir viloyatning bitta bayramdagi mushakbozlik uchun xarajatlari shu viloyat ayollarini oliy ta’lim olishga rag‘batlantirish uchun berilayotgan mablag‘lardan ko‘p.
Navoiy viloyati hokimi vazifasini bajaruvchi Normat Tursunov 15 dekabr kuni mablag‘ ajratish haqida farmoyish imzoladi.
Hujjatda bir qator maqsadlar uchun viloyat mahalliy budjeti 3-chorak daromadlarining rejadan orttirilib bajarilgan qismidan 2 mlrd 901 mln so‘m yo‘naltirish belgilangan.
Xususan, hokim farmoyishida O‘zbekiston Respublikasi davlat mustaqilligining 28 yillik bayramini (2019 yil) yuqori saviyada o‘tkazish uchun ajratilgan mushaklardan hosil bo‘lgan qarzdorlikni qoplash uchun 443,9 mln so‘m ajratish ko‘zda tutilgan. Bunga bosh vazir birinchi o‘rinbosarining 2021 yil 3 sentyabrdagi 06/18-Yu-15-0/11845-sonli topshirig‘i asos sifatida ko‘rsatilgan.
Shuningdek, hujjat bilan:
- “Besh tashabbus” bo‘yicha media-markaz tashkil etish bilan bog‘liq xarajatlarga 400 mln so‘m;
- Prezident, ijod va ixtisoslashtirilgan maktablarni rivojlantirish jamg‘armasiga 1 mlrd so‘m;
- xotin-qizlarga bazaviy to‘lov kontrakt summasini to‘lash maqsadida ro‘yxat asosida barcha tuman va shaharlarga jami 310 mln so‘m ajratilgan.
Farmoyishda mushakbozlik uchun mablag‘ viloyat Madaniyat boshqarmasi hisob raqamiga o‘tkazilishi ko‘rsatilgan.
Navoiy viloyati madaniyat boshqarmasi boshlig‘i Nodir Niyozovning Kun.uz'ga ma’lum qilishicha, bayramlarda mushakbozlik buyurtma asosida viloyat Favqulodda vaziyatlar boshqarmasi nazorati ostida Mudofaa sanoati davlat qo‘mitasi mutaxassislari tomonidan tashkil etiladi. Ajratilgan mablag‘ ham Madaniyat boshqarmasidan Favqulodda vaziyatlar boshqarmasiga o‘tkazib beriladi.
2021 yil 7 sentyabrda ham Navoiy viloyati hokimining farmoyishi asosida mustaqillikning 30 yilligi bayrami xarajatlari uchun viloyat madaniyat boshqarmasiga 450 million so‘m berilgan.
