Buxoro shahrida hokimiyat hisobidan bepul uy olib bermoqchi bo‘lgan soxta xodim ushlangan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qilmoqda.
Ma’lum qilinishicha, muqaddam firibgarlik jinoyati uchun sudlangan fuqaro I.B. o‘zini Buxoro shahar hokimligi xodimi deb tanishtirib, fuqaro N.ga shahar hokimligi tomonidan ajratiladigan bepul uylardan birini olib berishi evaziga 2 000 AQSh dollarini qo‘lga kiritgan. I.B. tomonidan ixtiyoriy qaytarilgan 3 mln so‘m va 1 750 AQSh dollarlari ashyoviy dalil sifatida olingan. Holat departamentning Buxoro viloyati boshqarmasi tomonidan o‘tkazilgan tergovga qadar tekshiruvda aniqlangan.
Hozirda holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Oldinroq Buxoroda haydovchilik guvohnomasini sotib olib berishni va’da qilgan shaxs qo‘lga olingandi.
