Qozog‘istonning Aqtau shahrida politsiya gaz narxi oshishiga qarshi o‘tkazilayotgan namoyishchilarga nisbatan kuch qo‘llashni boshladi, deb xabar berdi “Lenta”.
Xabarda aytilishicha, politsiyachilar bir-birlarining qo‘llarini chalishtirib, namoyishchilarni kuch bilan siqib chiqarmoqda.
Shuningdek, xabarlarga ko‘ra, namoyishchilar Aqtau aeroporti yo‘lini to‘sib qo‘yishgan.
2 yanvar kuni Qozog‘istonning Mang‘istau oblasti Janao‘zan shahri aholisi gaz narxi ko‘tarilganidan norozilik bildirgan va hukumatdan narxni ikki baravarga kamaytirishni talab qilib, namoyishga chiqqan. Namoyishlar 3 yanvar kuni ham davom etgan.
3 yanvar kuni Qozog‘iston prezidenti Qosim-Jo‘mart To‘qayev respublika hukumatiga “Janao‘zandagi vaziyatni zudlik bilan ko‘rib chiqish” bo‘yicha topshiriq berganini ma’lum qilgan.
O‘z navbatida, vazirlar mahkamasi Mang‘istau oblastidagi ijtimoiy-iqtisodiy vaziyatni ko‘rib chiqish bo‘yicha komissiya tuzilganini va gaz narxini barqarorlashtirish bo‘yicha chora-tadbirlar amalga oshirilishini bildirgan.
Avvalroq Mang‘istau oblasti ma’muriy markazi Aqtau shahri aeroportiga ikkita harbiy-transport samolyotlari yetib kelgani xabar qilingandi.
Mang‘istau oblastidagi noroziliklar fonida respublikaning yirik shaharlarida xavfsizlik choralari kuchaytirilgani aytilmoqda.
