«O‘zavtosanoat» elektromobil ishlab chiqarish bo‘yicha Xitoy kompaniyasi bilan muzokaralar boshlaydi

O‘zbekiston Xitoyning BYD kompaniyasi bilan elektromobillar ishlab chiqarishda hamkorlik qiladi. Bu haqda «O‘zavtosanoat» rahbari o‘rinbosari Aziz Shukurov ma’lum qildi.

«Bugun biz Xitoyning eng yirik elektromobil ishlab chiqaruvchi BYD kompaniyasi bilan kelishuv imzolamoqdamiz. Elektromobillar kelajagiga dastlabki kadam», deb yozdi u Linkedin’dagi sahifasida.

Qayd etilishicha, tomonlar o‘rtasidagi hamkorlik memorandumi 16 fevral kuni imzolangan.

BYD Co Ltd (Build Your Dreams) Xitoydagi eng yirik elektromobil ishlab chiqaruvchi kompaniya hisoblanadi. 2021 yilning 9 oyi davomida faqatgina Tesla BYD’ga qaraganda ko‘proq elektromobillar ishlab chiqargan.

Avvalroq, Prezident Shavkat Mirziyoyev 14 fevral kuni mashinasozlik sanoatidagi ustuvor vazifalar muhokamasi yuzasidan o‘tkazilgan yig‘ilishda soha mutasaddilariga uch oy muddatda elektromobil tarmog‘ini rivojlantirish strategiyasini ishlab chiqish bo‘yicha topshiriq bergandi. Bunda:

• elektromobillar uchun butlovchi qism va materiallarni mahalliylashtirish dasturini;
• elektromobillar uchun texnik talab va zamonaviy standartlarni ishlab chiqish vazifasi qo‘yilgan.

Shuningdek, yil yakuniga qadar xorijiy kompaniyalar bilan muzokaralarni yakunlab, strategik hamkor bilan loyihani boshlash yuzasidan ko‘rsatma ham berilgandi.

Eslatib o‘tamiz, 2020 yilda dekabrda qabul qilingan hukumat qarorida, “O‘zavtosanoat” AJ korxonalarini faqat elektromobil ishlab chiqarishga o‘tkazish konsepsiyasini ishlab chiqish belgilangan edi.

Undan avvalroq, 2018 yildagi qarorda 2020 yilgacha Buxoroda elektromobil ishlab chiqarishni boshlash ko‘zda tutilgandi. 2019 yildagi qarorda esa 2022 yildan boshlab Qo‘qonda elektromobil chiqarish boshlanishi belgilangan, ularning narxi 3 ming dollardan boshlanishi aytilgandi. UzAuto Motors esa 2021 yildan Labo elektromobilini ishlab chiqarishni yo‘lga qo‘ymoqchi edi, uning narxi 10 ming dollar atrofida bo‘lishi ma’lum qilingandi.