Yangiyo‘l va Guliston tumanlarida ochiq budjet portalida g‘olib bo‘lgan tashabbuslar amalga oshmayotgani haqidagi maqola bo‘yicha tegishli hokimliklar munosabat bildirdi.
Xususan, Yangiyo‘l tumani hokimligi ko‘prik qurilishi masalasida izoh berishicha, tashabbusda so‘ralgan 100 mln so‘m mablag‘ pudratchilarni qiziqtirmagani sababli loyiha summasi hokimlik tomonidan oshirilgan holda tanlov uchun qayta e’lon beriladi.
“Tuman hokimligi tomonidan tanlov jarayonida pudratchilar tomonidan taklif bildirilmagani sabablari tahlil qilinganda fuqaro Ikrom Rixsiboyev tomonidan taklif qilingan 100 mln so‘m mablag‘ga piyodalar o‘tishi uchun mo‘ljallangan ko‘prik loyihasini amalga oshirish imkoni yo‘qligi aniqlandi.
Hozirda ushbu ko‘prikni mukammal ta’mirlash uchun qaytadan loyiha-smeta hujjatlari tayyorlanib, talab etiladigan mablag‘ga aniqlik kiritiladi hamda yetishmagan qismi mahalliy budjetning qo‘shimcha mablag‘lari hisobidan ajratilgan holda loyihaning qisqa muddatda amalga oshirilishini ma’lum qilamiz” – deydi Yangiyo‘l hokimligi axborot xizmati.
Shuningdek, Gulistondagi holat bo‘yicha Sirdaryo viloyati hokimligi munosabat bildirdi.
Unda aytilishicha, loyihani amalga oshirish uchun ajratilgan 500 mln so‘m mablag‘ Guliston tumani Mahalla va oilani qo‘llab-quvvatlash bo‘limiga o‘tkazilgan hamda loyiha qisqa muddatlarda amalga oshirilishi ta’minlanadi.
“Bugungi kunda, Guliston tumani Mahalla va oilani qo‘llab-quvvatlash bo‘limi tomonidan tashabbusda ko‘rsatilgan loyihani amalga oshirish uchun “Hududgaz Sirdaryo” gaz ta’minot filialidan texnik shart olingan bo‘lib, Davlat xaridlari bo‘yicha Tovar-xomashyo birjasi elektron portaliga tanlov o‘tkazish uchun e’lon joylashtirilgan. Loyiha qisqa muddatda “Davlat xaridlari to‘g‘risida”gi qonunga muvofiq amalga oshirilishi ta’minlanadi”, – deyiladi Sirdaryo viloyati hokimligi axborotida.
