APLda Gvardiola – Konte to‘qnashuvi, La Ligada «Barsa» azaliy raqibiga qarshi. Hafta o‘yinlari anonsi

Hafta o‘rtasida o‘tgan yevrokuboklar juma kuni milliy chempionat o‘yinlariga, xususan Turin derbisiga ulanib ketdi va «Yuventus» yana ochko yo‘qotdi. Angliyada esa bugun, 19 fevral kuni Pep Gvardiola va Antonio Kontening navbatdagi to‘qnashuvi bo‘lib o‘tadi. Ispaniyada bask derbisi, shuningdek, Angliyaning eng katta qarama-qarshiliklaridan biri ushbu dam olish kunlari bizni kutib turibdi.

19 fevral (shanba)

MANCheSTeR SITI – TOTTeNHEM

O‘yin boshlanish vaqti: 22:30

TV-translatsiya: FutbolTV

Jamoalar ushbu mavsumning ilk turida ham Londonda to‘qnash kelishgan va o‘shanda mezbonlar 1:0 hisobida g‘alaba qozongandi. Ko‘p narsa o‘zgardi, hatto «Tottenhem»ning murabbiyi ham boshqa – Antonio Konte. «Manchester Siti» esa o‘sha mag‘lubiyatdan keyingi 24 o‘yinda yana atigi bir marta yutqazdi, xolos va ayni damda APLda 9 ochkolik farq bilan peshqadamlik qilmoqda. Yevrokuboklar va tig‘iz taqvimlar oldidan Gvardiola shogirdlari ochko yo‘qotmaslikka harakat qilishlari tabiiy, zero asosiy ta’qibchi bo‘lmish «Liverpul» ham qatorasiga g‘alaba qozonib kelmoqda.

Lekin «Tottenhem» biroz muvaffaqiyatsiz davrni boshdan kechiryapti. Konte kelganidan beri, Angliyada 8 o‘yinda mag‘lubiyatga uchramagan jamoa qatorasiga uch o‘yinda mag‘lubiyatga uchradi. «Chelsi» bilan safar o‘yinini tushunish mumkin, raqib kuchli edi, ammo keyingi ikki uy uchrashuvida jadvalda pastroq joylashgan jamoalardan mag‘lubiyatlar ancha og‘ir bo‘ldi. Yo‘qotilgan ochkolar bo‘yicha hatto APLda uchinchi o‘rinda bo‘lgan va YeChL yo‘llanmasi uchun kurashda favorit bo‘lgan «Tottenhem» 8-o‘ringa tushib ketdi.

Tarkiblar borasida har ikki jamoada ham aytarli muammo yo‘q. Mezbonlardan Grilishning qaytishi hali noma’lum bo‘lsa, shuningdek, Jyezusning o‘ynashi ham shubha ostida. Shu bilan birga «Siti» hafta o‘rtasida YeChL doirasida Portugaliyada o‘z o‘yinini o‘tkazdi va Gvardiola tarkibda bir qator rotatsiyalarni amalga oshirishi ham mumkin. Mehmonlardan esa Tanganga va Oliver Skiplarda jarohat bor.

Shuningdek, Harri Keynning «Etihad»da maydonga tushishi ham o‘ziga yarasha e’tiborga arzirli bo‘lishi kerak. Hujumchini yoz bo‘yi «Manchester Siti» sotib olishga muvaffaqiyatsiz urinib ko‘rgan va hali ham fikridan voz kechgani yo‘q. Futbolchi esa Manchesterga o‘tish uchun hatto o‘z klubida mashg‘ulotlardan voz kechgandi. Yuqorida tilga olingan 1-tur o‘yinida ham Keyn qatnashmagandi.

O‘zaro o‘yinlarga kelsak, «Tottenhem» o‘z maydonida raqibga jiddiy qarshilik qilib kelsa-da, aynan Manchesterdagi o‘yinlarda u qadar muvaffaqiyatli emas. Londonliklar oxirgi o‘n yilda atigi bir marotaba, 2016 yilning fevralida safarda g‘alaba qozongan, xolos. Ammo yana bir o‘yin borki, mezbonlar uchun mag‘lubiyatdan ham alamli yutuq bilan tugagandi. Chempionlar Ligasi chorakfinalida «Siti» 4:3 hisobida ustun kelgan, ammo ilk o‘yinda 1:0 hisobida yutgan «Tottenhem» yarimfinalga chiqqandi. Lorentening goli bilan vaziyatni o‘z tomoniga og‘dirgan mehmonlar, so‘nggi daqiqalarda Agueroning yakunda VAR hisobga olmagan goli, umuman o‘sha o‘yin YeChLning durdona o‘yinlaridan biri sifatida tarixdan joy olgandi.

20 fevral (yakshanba)

LIDS – MANCheSTeR YuNAYTeD

O‘yin boshlanish vaqti: 19:00

TV-translatsiya: FutbolTV/UzReportTV

«Lids» va «MYu» o‘yinlari Angliyada «Atirgullar to‘qnashuvi» yoki «Penin derbisi» deb nomlanadi va qarama-qarshilik shiddati va jiddiyati borasida juda ko‘p ingliz derbilarini ortda qoldiradi. Ushbu adovatning tarixi to 15-asrga, Lankashir va Yorkshir grafliklarining «qizil va oq atirgullar» urushlariga borib taqaladi. Angliyada futbol paydo bo‘lib, Shimoliy Angliyada bu klublar o‘ynay boshlabdiki, «atirgullar derbisi» futboldan ham katta to‘qnashuvga aylanib ketadi.

To‘g‘ri, 90-yillarda har ikki jamoa ham yuqori o‘rinlar uchun kurashgan va bu derbi APLda juda katta voqeaga aylanib ketardi.

Hozir ham yomon emas, birinchidan, «Elland Roud» o‘n yetti yillik tanaffusdan keyin birinchi marta «Manchester Yunayted»ni APLda qabul qilmoqda. O‘n yil oldin jamoalar faqat Angliya kubogida to‘qnash kelgan bo‘lishsa, o‘tgan mavsumdagi o‘yin bo‘sh tribunalar ostida bo‘lib o‘tgandi. «Lids Yunayted» muxlislari uchun juda katta voqea. Ikkinchidan, bu o‘yinni qaysidir ma’noda murabbiylik metrlarining to‘qnashuvi deb ham baholash mumkin. Belsa ispan, Rangnik esa nemis murabbiylari maktabining g‘oyaviy yo‘lboshchilari sanalishadi. Qiziq bo‘ladi.

«Manchester Yunayted» hozirda kuchli to‘rtlikdan o‘rin olib turgan bo‘lsa-da, raqobatchilar ko‘p, masalan «Arsenal» uch o‘yin kam o‘tkazgan holda atigi 4, «Tottenhem» esa 7 ochko ortda qolmoqda. Ya’ni yo‘qotilgan ochkolar bo‘yicha «MYu» top-4 dan tashqarida va ochko yo‘qotishga haqqi yo‘q. «Lids»ning holati ham xavas qilgulik emas – jamoa xavfli zonadan teparoqqa chiqib olgan bo‘lsa-da, atigi 4 ochkolik masofa bor xolos. Har bir o‘yinda ochko uchun kurashishi tabiiy. «Aston Villa» (3:3), «Vest Hem»ga (3:2) qarshi o‘yinlarda Belsa shogirdlari juda yaxshi sport formasida ekanliklari va mavsum boshidagi «Lids»dan kuchliroq ekanini namoyish qildi. 

Asosiy sabab esa albatta, jarohatlangan futbolchilarning ancha kamayib qolganidir. Filips va Kuperning safga qaytishiga bir necha hafta bor, Bemford ham bu o‘yinga tayyor bo‘lishi imkonsiz. Shuningdek, Styuart Dallasning ham holati shubha ostida qolmoqda. Mehmonlardan esa Rangnikning so‘zlariga qaraganda, Edison Kavani mashg‘ulotlarga qaytgan bo‘lsa-da, o‘yinga tayyor bo‘lishi qiyin. Ammo Nemanya Matich va kutilmaganda, «Brayton» bilan uchrashuv oldidan kasallanib qolgan Rafael Varan borasida murabbiy optimistik taxminlarni bildirdi.

20 fevral (yakshanba)

VALeNSIYa – BARSeLONA

O‘yin boshlanish vaqti: 20:15

TV-translatsiya: FutbolTV/UzReportTV

«Atletiko»ning chorshanba kungi mag‘lubiyatidan so‘ng, «Barselona»ning top-4 uchun imkoniyati yanada oshganini ta’kidlash mumkin. Endilikda kataloniyaliklar «Atletiko»dan ko‘ra bir o‘yin kam o‘tkazgan holda bir xil ochkoga ega. Bu uchrashuv esa yanada mustahkam joylashish va 3-o‘rindagi «Betis»ga yaqinlashish uchun yaxshi imkoniyat.

«Valensiya» ikki oydan beri La Ligada g‘alaba nimaligini bilmay kelmoqda. Oxirgi marta o‘tgan yilning 21 dekabrida «Levante»ga qarshi derbida g‘alaba qozongandi. Qizig‘i, shu holatdayam valensiyaliklar xavfli zonadan ko‘ra, yevrokuboklar yo‘llanmasi uchun yaqinroq. Qatorasiga ikki g‘alaba ham «Valensiya»ga yettinchi o‘ringa ko‘tarilish imkonini beradi.

Bordalas shogirdlari safida faqat Gabriyel Paulista hali to‘liq tiklanib ulgurgani yo‘q. O‘z vaqtida «Barselona» sharafini ham himoya qilgan darvozabon Sillessen ham bir necha haftadan keyin safga qaytadi. «Barselona»da aksincha, har hafta jamoa safiga jarohatdan tiklangan futbolchilar qo‘shilayotgan bo‘lsa-da, lazaret hali ham to‘la. Fati, Langle, Umtiti, Roberto ushbu uchrashuvda maydonga tusha olmasligi aniq bo‘lgan futbolchilar. Shuningdek, Depay va Arauxoning sheriklariga yordam berish imkoniyati juda past.

O‘zaro o‘yinlarga kelsak, jamoalarning ayniqsa Valensiyadagi to‘qnashuvlari juda shiddatli kurashlar ostida kechadi. O‘tgan mavsumda mehmonlar 3:2 hisobida irodali g‘alabaga erishgandi. Undan oldingi to‘rt uchrashuvda «Barselona» yuta olmagan. Umuman olganda oxirgi 30 o‘yinning atigi 4 tasida «Valensiya» ustun kelgan, 17 uchrashuvda «Barselona»ning qo‘li baland kelgan.

Darvoqe, Xavi shogirdlari payshanba oqshomida «Napoli»ga qarshi Yevropa Ligasi uchrashuvini o‘tkazdi. Ya’ni tiklanish va o‘yinda yaxshiroq jismoniy formada bo‘lish borasida «Valensiya»da oz bo‘lsa-da, ustunlik bo‘lishi mumkin.

20 fevral (yakshanba)

ATLeTIK – ReAL SOSeDAD

O‘yin boshlanish vaqti: 01:00

TV-translatsiya: FutbolTV/UzReportTV

Aytish mumkinki, ushbu mavsum bask jamoalari uchun ancha muvaffaqiyatli kechmoqda. «Atletik» Superkubok finalida o‘ynadi, mamlakat kubogida esa «Real» hamda «Barselona»ni musobaqadan chiqarib yuborib, yarimfinal ishtirokchisiga aylandi. San-sebastiyanliklar esa La Ligada yuqori o‘rinlar va Chempionlar Ligasi yo‘llanmasi uchun kurashmoqda. Yevropa Ligasida ham «Sosedad» pley-offda «Leypsig» bilan safarda durang o‘ynadi va keyingi bosqichga chiqish uchun yaxshi imkoniyat hosil qilgan.

Oxirgi ikki derbida bir xil – 1:1 hisobida yakunlangan va qizig‘i, har ikki uchrashuvda jamoalar navbati bilan so‘nggi daqiqa mag‘lubiyatdan qutulib qolishgan. Umuman olganda oxirni 25 to‘qnashuvning 7tasida bilbaoliklar, 11tasida esa san-sebastiyanliklarning qo‘li baland kelgan. Aynan Bilbaoda o‘tgan oxirgi o‘yin esa mamlakat kubogi doirasida bo‘lgandi – Oyarsabalning penaltidan urgan goli mehmonlarga kichik hisobdagi g‘alabani taqdim etgandi.

Tarkiblar borasida mehmonlarning muammosi ko‘proq – Monreal, Riko, Luna, Barranechea hamda Yanuzay sheriklariga yordam bera olmaydilar. «Atletik» safida esa Niko Uilyams va Unai Vankedorda jarohat bor. Shuningdek, Ander Kapada kovid aniqlangan.

Yuqorida ham aytilgani kabi, xuddi «Barselona» singari «Sosedad» ham payshanba kuni Yevropa Ligasida maydonga tushdi. Ya’ni jismoniy tayyorgarlik borasida mezbonlarda qo‘shimcha ustunlik bo‘ladi.

BOShQA O‘YINLAR

19 fevral. ARSeNAL – Brentford (20:00), LIVeRPUL – Norvich (20:00), Kristal Pelas – CheLSI (20:00), Osasuna – ATLeTIKO (20:15), ROMA – Verona (22:00), MANCheSTeR SITI – TOTTeNHEM (22:30), Salernitana – MILAN (20 fevralga o‘tar kechasi, 00:45), ReAL – Alaves (20 fevralga o‘tar kechasi, 01:00), Nant – PSJ (20 fevralga o‘tar kechasi, 01:00)

20 fevral. Fiorentina - ATALANTA (16:30), BAVARIYa – Groyter (19:30), BORUSSIYa D – Borussiya M (21:30), INTeR – Sassuolo (22:00)

21 fevral. Kalyari – NAPOLI (23:00).