Tashqi ishlar vazirligi ma’lumotiga ko‘ra, 1 mart holatiga O‘zbekiston diplomatik vakolatxonalari va mutasaddi tashkilotlarining sa’y-harakatlari natijasida Ukrainadan jami 509 nafar O‘zbekiston fuqarosi vatanga qaytarildi.
«Hozirgi vaqtda «Karchova» nazorat-o‘tish punktidagi to‘planish joyida bo‘lib turgan 650 dan ortiq fuqarolarimiz uchun barcha zarur sharoitlar yaratilgan. Yurtdoshlarimizni olib kelish uchun yana qator evakuatsion reyslarni tashkillashtirish ko‘zda tutilmoqda», deyiladi xabarda.
O‘zbekistonning Polshadagi elchixonasi diplomatlari fuqarolarning masalalarini hal qilish bilan shug‘ullanmoqda va ularning aeroportda bo‘lib turishlarini muvofiqlashtirmoqda. Elchixonada uzluksiz ishlaydigan tezkor shtab tashkil etilgan.
Avvalroq, Ukrainadan evakuatsiya qilingan o‘zbekistonliklarning ilk guruhi Toshkentga yetib kelgandi.
Ushbu maxsus reys bilan 251 nafar O‘zbekiston fuqarosi Polshaning Katovitse shahridan olib kelindi. Olib kelinganlarning 37 nafari bolalar va 10 nafar chaqaloqlar.
