Xotin-qizlar va oila ishlari qo‘mitasi tashkil etildi

O‘zbekistonda Xotin-qizlar va oila ishlari qo‘mitasi tashkil etildi. Oliy Majlis Qonunchilik palatasining majlisida deputatlar Zulayho Mahkamovaning nomzodini bosh vazir o‘rinbosari — Xotin-qizlar va oila ishlari qo‘mitasi rahbarligiga ma’qullashdi. Bu haqda  «Nigoh» kanali xabar berdi.

Zulayho Mahkamova 1968 yilda Namangan viloyatining Yangiqo‘rg‘on tumanida tug‘ilgan. 1989 yili Namangan davlat pedagogika instituti va keyinchalik Prezident huzuridagi Davlat va jamiyat qurilishi akademiyasini tamomlagan. Mutaxassisligi o‘qituvchi-pedagog.

U turli yillarda Yangiqo‘rg‘on tumani hokimligida turli lavozimlarda ishlagan, Namangan viloyati kasaba uyushma tashkilotlari birlashmasi raisi, Namangan viloyati hokimi o‘rinbosari - viloyat xotin-qizlar qo‘mitasi raisi lavozimlarida ham faoliyat yuritgan.

U 2018 yilning aprel oyidan O‘zbekiston Xotin-qizlar qo‘mitasi raisining birinchi o‘rinbosari lavozimida ishlagan. Qo‘mita tugatilgach, 2020 yil 4 martida Namangan viloyati To‘raqo‘rg‘on tumani hokimi lavozimiga tayinlangandi.