07:26 / 05.03.2022
15784
Польша президенти Ўзбекистон фуқаролари бўлиб турган ҳудудга келиб, улар билан суҳбатлашди

2022 йил 4 март куни чет эл, жумладан, Ўзбекистон фуқаролари бўлиб турган Украина-Польша чегарасидаги "Карчова" назорат-ўтказиш пункти яқинидаги тўпланиш нуқтасига Польша президенти Анжей Дуда ташриф буюрди.

Видеодан кадр

Ташрифи давомида мамлакат раҳбари биринчи навбатда Ўзбекистоннинг Польшадаги элчихонаси дипломатлари ёнига келиб, уларнинг қўлини сиқиб, шундай деди:

“Сиз юртингиз фуқаролари учун муҳим ва эзгу ишни қиляпсиз. Сизнинг ҳаракатларингизни кўриб бошқа давлатлар дипломатлари ва кўнгиллилар фаолиятингиздан илҳом олиши шубҳасиз. Менга Ўзбекистон ҳукумати ўз фуқароларини эвакуация қилишни биринчи бўлиб бошлагани ҳақида айтиб беришди ва бу саъй-ҳаракатларингизни Ўзбекистон ҳукуматининг ўз фуқароларига нисбатан муҳим эътибори ва оталарча ғамхўрлиги деб биламан.

Аввалроқ биз ҳам худди шундай вазиятга тушиб қолгандик ва сизга қўшни бўлган давлатни тарк этган фуқароларимиз ҳамда Европа мамлакатларининг фуқароларидан хавотирда эдик. Биз уларни эвакуация қилишдек бу оғир операцияни фақат Ўзбекистоннинг фаол кўмаги билан амалга ошира олдик. Бу бизнинг ёдимизда”.

Анжей Дуда Ўзбекистон фуқаролари билан суҳбатлашиб, уларни қўллаб-қувватлаши ва зарур ёрдам кўрсатишини айтиб ўтди.

Бундан аввал Украинадан Польша орқали эвакуация қилинган ўзбекистонликлар сони 2,5 минг кишидан ошгани ҳақида хабар берилганди.

Мавзу
Украина инқирози
2021 йил давомида Россия Украина билан чегарада қўшин тўплади. Сўнгги вақтларда минтақада вазият кескинлашмоқда.
Барчаси
Top