Toshkent, Sirdaryo va Jizzax viloyati hokimlariga yangi o‘rinbosarlar tayinlandi

Toshkent viloyati hokimining qarori bilan Mirg‘oziyeva Zuhra To‘rayevna –viloyat hokimi o‘rinbosari – Oila va xotin-qizlar boshqarmasi boshlig‘i vazifasini bajaruvchi etib tayinlandi.

Z. Mirg‘oziyeva 1978 yilda Toshkent viloyatining Chirchiq shahrida tug‘ilgan. Ma’lumoti oliy, 2001 yilda Toshkent Davlat Pedagogika universitetini tamomlagan. Faoliyatini 1996 yil 76-maktabda o‘qituvchi vazifasidan boshlagan. 2009 yildan 2020 yilga qadar Toshkent viloyati Chirchiq shahar hokimligida turli mas’ul lavozimlarda ishlagan.

Mazkur tayinlovgacha, Z.Mirg‘oziyeva Toshkent viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelayotgan edi.

Sirdaryo viloyati hokimining qarori bilan Tojiboyeva Nargiza Keldibekovna viloyat hokimining o‘rinbosari – Oila va xotin-qizlar boshqarmasi boshlig‘i vazifasini bajaruvchi etib tayinlandi.

Mazkur tayinlovgacha, N.Tojibayeva viloyat Mahalla va oilani qo‘llab-quvvatlash boshqarmasi boshlig‘ining birinchi o‘rinbosari vazifasida ishlab kelayotgan edi.

Jizzax viloyati hokimining qarori bilan Muxtorova Nazira Abdusattorovna – viloyat hokimining o‘rinbosari, Oila va xotin-qizlar boshqarmasi boshlig‘i vazifasini bajaruvchi etib tayinlandi.

Mazkur tayinlovgacha N.Muxtorova Jizzax viloyati hokimi o‘rinbosari – Mahalla va oilani qo‘llab-quvvatlash boshqarmasi boshlig‘i lavozimida ishlab kelayotgan edi.