Aksilmonopol qo‘mita 178ta laboratoriya bitta operatorga biriktirilgani bo‘yicha o‘rganish boshladi

10 mart kuni Kun.uz “Tibbiyotda yangi monopoliya? 178ta laboratoriya bitta operatorga berildi” sarlavhali maqola e’lon qildi. Unda Sog‘liqni saqlash vazirining buyrug‘i bilan Toshkent shahri va Toshkent viloyatidagi deyarli barcha davlat shifoxonalarining laboratoriyalari ta’sischisi xorijdagi korxona bo‘lgan Intermed Innovation'ga topshirilgani ma’lum qilingandi.

Monopoliyaga qarshi kurashish qo‘mitasi holat yuzasidan dastlabki o‘rganish ishlari olib borilishi va qo‘shimcha ma’lumot taqdim etilishini bildirdi.

Qo‘mita mas’ulining Kun.uz'ga bildirishicha, jarayon uzog‘i bilan bir oyda yakunlanadi.

“O‘rganish yuzasidan sog‘liqni saqlash vaziriga so‘rov chiqaryapmiz. Ikki vazir buyrug‘ini ko‘rib chiqamiz, keyin holatni o‘rganish uchun hududiy boshqarmalarga topshiriq beramiz. Ular xulosasini bergandan keyin natija bo‘ladi. So‘rov xati chiqarilgach, javob xatini taqdim etish uchun belgilangan muddat – 10 kun. Vazirlik javob xati berishni 10 kundan bir oygacha uzaytirishi mumkin. Biz iloji boricha, 10 kunda javob xatini olib, 15 kunda yakuniy xulosa berishga harakat qilamiz”, – dedi Antimonopoliya qo‘mitasi mas’uli.

Ma’lumot uchun, fevral oyida Intermed Innovation Yunusobod va Mirzo Ulug‘bek tumanlaridagi davlat klinikalarida loyihalarni ishga tushirib, foydalanishga topshirgan. Bu haqda kompaniya OAVda e’lon qilgan ma’lumotlarida keltirilgan. Monopoliyaga qarshi kurash qo‘mitasi masalaning bu tomonlarini inobatga olib, yakuniy xulosa berish tezlashtirilishini bildirdi.