Birinchi kanal muharriri «Vremya» efirida Ukrainadagi urushga qarshi chiqish qildi. Uni qo‘lga olishdi

Boshlovchi Yekaterina Andreyeva bosh vazir Mixail Mishustinning xalqaro sanksiyalar oqibatlarini yumshatish rejalari bo‘yicha gapirayotgandi, uning ortida esa kutilmaganda NOWAR (urushga yo‘q) yozuvi tushirilgan plakat bilan Ovsyannikova paydo bo‘ldi.

Plakatda ingliz va rus tillarida «Urushga yo‘q. Urushni to‘xtating. Propagandaga ishonmang. Bu yerda sizni aldashmoqda. Rossiyaliklar urushga qarshi» deb yozilgandi va dasturning keyingi qismiga o‘tilgunga qadar Ovsyannikova «Urushni to‘xtating! Urushga yo‘q!» degan so‘zlarni bir necha bor takrorlashga ulgurdi.

TASS xabariga ko‘ra, Ovsyannikovani qo‘lga olishgan, unga nisbatan Ma’muriy javobgarlik to‘g‘risidagi kodeksning 20.3.3 moddasi bo‘yicha (Rossiya qurolli kuchlarini obro‘sizlantirganlik uchun) protokol tuzilgan, Birinchi kanal esa «jonli efir chog‘ida kadrda begona odam paydo bo‘lishi» bilan bog‘liq vaziyat yuzasidan xizmat tekshiruvi o‘tkazishni boshlagan.

Keyinroq «OVD-Info» Marina Ovsyannikova «Vremya» dasturida urushga qarshi plakat bilan chiqishidan oldin yozgan videomurojaatni tarqatdi.

«Hozirda Ukrainada bo‘layotgan voqealar - bu jinoyat. Rossiya - bosqinchi mamlakat. Va bu jinoyat uchun mas’uliyat faqat bir kishining vijdoniga havola. Bu odam - Vladimir Putin», - degan u.

Ovsyannikova uning otasi ukrain, onasi esa rusligini aytib, «ular hech qachon bir-biriga dushman bo‘lmagani»ni ta’kidlaydi.

Marina so‘nggi yillarda Birinchi kanalda ishlab, Kreml propagandasi bilan shug‘ullanganini afsus bilan tan oladi va endi bundan qattiq uyatda ekanini aytadi: «Televizor ekranidan yolg‘on gapirilishiga yo‘l qo‘yganim uchun uyatdaman. Rus kishilarini zombilashtirishga yo‘l qo‘yganim uchun uyatdaman».

U ruslarni urushga qarshi mitinglarga chorlagan.

«Biz barchasi endi boshlangan 2014 yilda jim turdik. Biz Kreml Navalniyni zaharlaganida mitinglarga chiqmadik. Biz bu aksilinsoniy rejimga indamay qarab turdik. Endi esa butun dunyo bizdan yuz o‘girdi. Va bizning o‘nlab avlodlarimiz bu birodarkushlik urushi sharmandaligini yuva olmaydi», degan u.

U bu aqlsizlikni to‘xtatish faqat odamlarning qo‘lida ekanini ta’kidlagan.

«Mitinglarga chiqing, hech narsadan qo‘rqmang, ular barchani qamay olmaydi!» - deya murojaatini yakunlagan u.

Avvaliga Marina Ovsyannikova «Ostankino»dagi ichki ishlar bo‘limida tutib turilganini ma’lum qilindi. Keyinroq advokat Pavel Chikov 12 soatdan buyon advokatlarga u bilan ko‘rishishga ruxsat berilmayotgani va u qayerdaligi noma’lum bo‘lib qolayotganini aytdi.

G‘arb nashrlarining ertalabki sonlari muqovalari Ovsyannikovaga bag‘ishlandi.