16:45 / 28.04.2022
3273
Ҳокимликлар ва бизнес-вакил аттракционлар хавфсизлигини таъминлашда эътиборсизлик қилмоқда — Сенат

28 апрел кунги Сенат ялпи мажлисида палатанинг Мудофаа ва хавфсизлик қўмитаси раиси томонидан Саноат хавфсизлиги давлат қўмитасига юборилган сенатор сўровининг жавоби бўйича маълумот берилди.

Фото: Сенат ахборот хизмати

Маълум қилинишича, Саноат хавфсизлиги давлат қўмитасининг Истироҳат боғлари аттракционларини назорат қилиш инспекцияси томонидан ҳудудлардаги 143 та маданият ва истироҳат боғларида ўрнатилган 1879 та аттракционлар ҳолати ўрганилган.

Аниқланишича:

  • аттракционларнинг 1263 тасида техник паспортлар йўқ;
  • 1212 та аттракционда ташриф буюрувчилар учун фойдаланиш бўйича ахборот стендлари йўқ;
  • 1644 та аттракцион техник-статик ва динамик синовлардан ўтказилмаган;
  • 1453 та аттракционда махсус корхона томонидан пўлат қисмларнинг техник ҳолати бўйича хулосалар мавжуд эмас.

Лекин камчиликлар юзасидан фуқаролар иштирокидаги бахтсиз ҳодисаларнинг олдини олиш мақсадида ҳокимликларга юборилган хатларга етарлича эътибор қаратилмаяпти.

“Қорақалпоғистон Республикаси Жўқорғи Кенгеси, вилоятлар ва Тошкент шаҳар ҳокимликларига ҳамда Фавқулодда вазиятлар вазирлигига ҳудудларда жойлашган Маданият ва истироҳат боғларида ўрнатилган қўлбола ва яроқсиз аттракционларни фойдаланишдан чиқаришда амалий ёрдам беришни сўраб, Саноат хавфсизлиги давлат қўмитаси томонидан хатлар юборилган.

Бироқ мутасадди ҳокимликлар томонидан ушбу масалага ҳанузгача етарли эътибор қаратилмаган. Бу эса ўз навбатида фуқаролари ва юртимиз меҳмонларининг ҳаёти ҳамда соғлиғи билан боғлиқ бахтсиз ҳодисалар содир бўлиши эҳтимолини янада кучайтирмоқда”, – дея Мудофаа ва хавфсизлик масалалари қўмитаси раиси Қутбиддин Бурҳоновнинг сўзларини келтирмоқда Kun.uz мухбири.

Маълум қилинишича, 2019-2021 йилларда аттракционлар билан боғлиқ 7 та бахтсиз ҳодиса содир бўлган ва уларда 3 нафар инсон ҳалок бўлган.

Шунингдек, 5594-сонли президент фармонига мувофиқ, истироҳат боғлари аттракционларини эксплуатация қилиш борасидаги қонун ҳужжатлари ва техник жиҳатдан тартибга солиш соҳасидаги норматив ҳужжатлар талабларига риоя этилиши устидан давлат назорати ва текширувини амалга ошириш Саноат хавфсизлиги давлат қўмитасига юклатилган.

Лекин Саноат хавфсизлиги давлат қўмитаси томонидан 2018-2021 йиллар давомида етарли даражада текширишлар ўтказилмаган, аттракционлар ҳолатига уларга техник жиҳатдан қонуний баҳо берилмаган.

Шунингдек, қўмитанинг юридик ва жисмоний шахслар тасарруфидаги аттракционлардан фойдаланиш ҳолатини бир йилда бир мартадан кўп бўлмаган назорат тадбирлари доирасида ўрганиш (текшириш) ҳақидаги мурожаатлари мутасадди идоралар ва Бизнес вакил томонидан эътиборсиз қолдирилмоқда, яъни қўмитага текшириш ваколати берилмаган.

Юқоридагиларни инобатга олган ҳолда Вазирлар Маҳкамасига навбатдаги ялпи мажлисда ахборот бериш учун қўшимча саволлар киритилди.

Top