Toshkent shahri yashillik darajasi 27 foiz - O‘zgidromet

7 iyun kuni AOKAda respublika hududlarida va Toshkent shahrida atmosfera havosi ifloslanishi monitoring natijalari holatiga bag‘ishlangan matbuot anjumani bo‘lib o‘tgandi. Unda O‘zgidromet bosh direktor o‘rinbosari Ibratjon Karimov Toshkent shahrining 3 foiz qismi yashillik bilan qoplangani haqida ma’lumot bergan.

Bosh direktor bergan ma’lumot ijtimoiy tarmoqlarda muhokamalarga sabab bo‘lgach, O‘zgidromet berilgan ma’lumotga raddiya e’lon qildi.

Unda aytilishicha, O‘zgidromet axborot xizmati mutaxassislar tomonidan Toshkent shahrining yashillik qismi bo‘yicha tayyorlangan ma’lumotda texnik xatolikka yo‘l qo‘yilgan.

"Shu tufayli axborot berilayotganda kamchilikka yo‘l qo‘yilgan. Bugungi kunda shaharning yashillik darajasi 26,8 foizni tashkil etadi. Keltirilgan noqulayliklar uchun jamoatchilikdan uzr so‘raymiz", – deyilgan xizmat xabarida.