Tanzila Norboyeva Jenevada Xalqaro mehnat tashkiloti bosh direktori bilan uchrashdi

Xizmat safari doirasida Senat raisi Tanzila Norboyeva Xalqaro mehnat tashkiloti bosh direktori Gay Rayder bilan uchrashdi.

Cuhbatda O‘zbekiston va XMT o‘rtasidagi aloqalar hozirgi holati va istiqbollari yuzasidan atroflicha fikr almashildi. Muzokaralar natijasida O‘zbekiston va XMT o‘rtasida hamkorlik qamrovini kengaytirishga, respublikada munosib mehnat sharoitlarini yaratish masalasida birgalikda ishlashga kelishib olindi.

Shuningdek, Tanzila Norboyevaning Jenevaga tashrifi doirasida Butunjahon intellektual mulk tashkiloti (BIMT) bosh direktori D.Tang bilan uchrashuvi bo‘lib o‘tdi.

Uchrashuvda intellektual mulkni himoya qilish hamda O‘zbekiston BIMT Global innovatsion indeksidagi o‘rnini yaxshilashga qaratilgan hamkorlikda amalga oshirilayotgan ishlarni davom ettirish masalalari muhokama qilindi.

D.Tang O‘zbekistonda intellektual mulk huquqlarini himoya qilish borasida amalga oshirilayotgan o‘zgarishlarni diqqat bilan kuzatib borayotganini, prezident tomonidan tasdiqlangan 2022-2026-yillarda intellektual mulk sohasini rivojlantirish strategiyasini puxta o‘rganib chiqqanini va mazkur strategiya davlat e’tibori isboti ekanini ta’kidladi.

Uchrashuvda BIMT O‘zbekistonga milliy qonunchilikni yanada takomillashtirish, intellektual mulk himoyasini kuchaytirish, fan yutuqlarini har bir sohaga joriy etish borasida har tomonlama yordam ko‘rsatishga tayyorligi bildirildi.

Tomonlar milliy brendlarni yaratish talabi va geografik nomlarni himoya qilish zarurligiga e’tibor qaratdi.

Muloqot natijasida BIMT tomonidan O‘zbekistonning intellektual mulk sohasidagi qator tashabbuslarini qo‘llab-quvvatlash bo‘yicha kelishuvga erishildi.