O‘zbekiston | 07:09 / 25.06.2022
13557
2 daqiqa o‘qiladi

Farg‘onada Qirg‘izistonga noqonuniy olib o‘tuvchi yerosti yo‘li aniqlandi

Farg‘ona viloyatining Rishton tumanida Qirg‘izistonga noqonuniy olib o‘tuvchi yer osti yo‘li aniqlandi. Bu haqda DXX xabar bermoqda.

Videodan kadr

Joriy yilning 23 iyun kuni Davlat xavfsizlik xizmati Chegara qo‘shinlari harbiy xizmatchilari tomonidan DXX Farg‘ona viloyati bo‘yicha boshqarmasi hamda viloyat IIB bilan hamkorlikda olib borilgan tezkor tadbir davomida Rishton tumanida yashovchi fuqaro T.M. boshqaruvidagi yuk avtomashinasi to‘xtatilib, ko‘zdan kechirilgan.

Avtomashinada tegishli hujjatlari bo‘lmagan, taxminiy qiymati 15 mlrd so‘mlik 2707 dona mobil telefonlar (IPhone 13 Pro Max, Samsung Galaxy S 22 ultra, RedMe Note 11 pro va h.k.) borligi aniqlanib, protsessual tartibda rasmiylashtirib olingan.

Tezkor tadbir davom ettirilib, fuqaro T.M. yashash xonadoni ko‘zdan kechirilganda, Qirg‘iziston Botken viloyati Qadamjoy rayoni hududiga olib o‘tuvchi, eni 1-1,5 metr, balandligi 2 metr, uzunligi taxminan 130 metr bo‘lgan yerosti yo‘li mavjudligi aniqlangan

Ta’kidlanishicha, ushbu yerosti yo‘li Qirg‘izistondan tovar-moddiy boyliklar olib o‘tishga mo‘ljallangan.

Hozirda holat yuzasidan Jinoyat kodeksi tegishli moddalari bilan jinoyat ishi qo‘zg‘atilgan.

Mavzuga oid