YeI kengashi Xorvatiyaning yevrohududga qo‘shilishini ma’qulladi

Yevropa ittifoqi kengashi yakuniy tarzda Xorvatiyaning 2023 yil 1 yanvardan yevro hududiga qo‘shilishi uchun zarur bo‘lgan huquqiy hujjatlarni ma’qulladi. Bu haqda YeI kengashi matbuot xizmatining 12 iyul, seshanba kuni chop etilgan bayonotida aytiladi.

Unda qayd etilishicha, aktlardan birida Xorvatiyaning amaldagi valutasi – kunaning bir yevro uchun 7,53450 kuna kursi belgilangan. Bu hozirgi kursga mos keladi.

Xorvatiya yevrohududga qo‘shilgan 20-davlatga aylanadi. Iyun oyi boshida Yevrokomissiya Xorvatiya umumiy Yevropa valutasiga o‘tish uchun zarur bo‘lgan mezonlarga javob berishini bildirdi. Oradan bir oy o‘tib, Yevroparlament deputatlari Xorvatiyaning kelasi yil boshidan yevro hududiga qo‘shilish iltimosiga rozi bo‘ldi.

Joriy yilning boshida Xorvatiya milliy banki Xorvatiya yevro va yevrosenti tangalari to‘plamini taqdim etdi. Tangalarning milliy tomoni dizaynida avval kelishilgan naqshlar aks etgan. Ikki yevrolik tanga uchun - bu Xorvatiya xaritasi, bir yevrolik tanga uchun - suvsar tasviri, 50, 20 va 10 yevrosentlik tangalar uchun - taniqli olim Nikola Teslaning portreti, besh, ikki va bir yevrosent uchun - Glagolitik harflar alifbosi kollaji. Shu bilan birga, barcha tangalar fonida shaxovnitsa - Xorvatiya gerbi tasvirlangan.

YeI shartnomasiga ko‘ra, Yevropa ittifoqining Daniyadan tashqari barcha davlatlari kelishuvda belgilangan mezonlarga javob bersa, yevro hududiga qo‘shilishi kerak. Hozirda yevro 19 ta Yevropa ittifoqi davlatida qo‘llaniladi. Litva 2015 yilda yevro hududiga oxirgi bo‘lib qo‘shilgan edi. Ba’zi davlatlar - Polsha, Chexiya va Vengriya - yevroni joriy qilmaslik uchun ataylab bu mezonlarni bajarishga shoshilmayapti.