Murod Azimov Senat a’zoligiga saylandi

Qashqadaryo viloyati teatri binosida xalq deputatlari viloyat, tuman va shahar kengashlari qo‘shma majlisi bo‘lib o‘tdi.

Foto: Qashqadaryo viloyati hokimligi

Qo‘shma majlis kun tartibiga bitta –Senatga Qashqadaryo viloyatidan bo‘shab qolgan o‘rin uchun Senat a’zosini saylash to‘g‘risidagi masala kiritildi.

Shundan kelib chiqib, Senat a’zosi saylovi bo‘lib o‘tdi. Sanoq komissiyasi belgilangan tartibda nomzodlarga berilgan ovozlarni sanab chiqib, natijalarni e’lon qildi.

Saylov natijalariga ko‘ra, viloyat hokimi Murod Azimov Senat a’zoligiga saylandi. Majlisda Markaziy saylov komissiyasi raisi Zayniddin Nizomxo‘jayev ishtirok etdi.

Murod Azimov 1976 yil Qashqadaryo viloyati Kitob tumanida tug‘ilgan. 1998 yilda Toshkent yuridik institutini tugatgan. Qarshi shahar prokuraturasida tergovchi, Qashqadaryo viloyat prokuraturasida prokuror, keyinroq viloyat prokurorining o‘rinbosari va tuman prokurori lavozimlarida ishlagan.

2014 yilda u Buxoro viloyati prokurori etib tayinlanib, u yerda 2016 yilgacha ishlagan. 2016 yil sentabr oyidan boshlab u O‘zbekiston bosh prokurori o‘rinbosari lavozimida ishlagan.

General-mayor Murod Azimov 2018 yil fevralida Bojxona qo‘mitasiga rais etib tayinlangandi. 2021 yil noyabrida Qashqadaryo viloyati hokimligiga tayinlandi.

Tayyorlagan: Отабек Матназаров

#Senat #Murod Azimov